Dîlan Babat

 

ENQERE - Parlamentera verê ya HDPyî Besîme Konca tecrîdê Îmraliyî û helwestê Ewropayî de ercnayîş kerd û vat: "CPT pêwa ke îşkenceyê Îmraliyî qebul keno zî çîyêk nêkeno. Çîyo ke ma girîng vînenê; ganî komelê Tirkîya vengê xo vejo. No şerêk topyekun o."

 

Rayberê PKKyî Abdullah Ocalan ke 22 serrî yo binê tecrîdî de yo 9 mengî yo zanayîş ci ra nîno girewtiş. Hewteyê vîyarte de Buroyê Huqûqî yê Asrin muracat kerd û 22yê teşrîna peyêne Dadgerîya Înfazî ya Bursayî de cewabê ke da, red kerd û qedexeyê pêvînayîşê 6 mengan ê 12  teşrîna verêne de ameyo dayîş û sewbîna qerarê Serekîya Heyetê Dîsîplînî yê Mudurîyê Sazgehê înfazê Cezaya Îmraliyî yê 18ê tebaxe de hîrê mengî cezaya pêvînayîşî dayo, sebeb mojnayî.  Heto bîn ra zî Komîteyê Wezîran ê Konseyê Ewropayî (KW KE) ke qontrolkerdişê qerarê Dadgeha Heqê Merdiman ê Ewropayî (DMME) berpirsîyar o û hîrê mengan ra reyke kombîyayîş keno emsar mabêne 30ê teşrîna peyêne û 2yê kanûne de kerd. Kombîyayîş hîrê rojan dewam kerd û komîteyê prosesê caardişê qeraran ercna û netîceyê pêvînayîşî bi eşkerayîyêk rayaumumî rê neql kerdî.

 

Parlamentera Partîya Demokratîke ya Şaran (HDP) ya verê Besîme Konca derheqê tecrîdê Îmraliyî de ercnayîş kerd.

 

'Mesaj danê komelî'

 

Besîme dîyar kerd ke Tirkîya hetê Îmraliyî de zanayîş nêdana û vat, no caardişê "Mîyanê tecrîdî de tecrîd o" û cezaya dîsîplînî ya semedê eştişê voltayî zî metodê şerî yo û wina vat: "22 serrî yo Îmrali bi bêhuqûqî dir rî bi rî yo. La serrê peyînan de no bi eşkera yeno kerdiş û no zî rewşêke nêzdîbîyayîşê faşîzmê AKP-MHPyî yo. Hemverê kurdan de kerdişê faşîzmî, qetilkerdiş, bêhuqûqî û mîyanê ceza de ceza meşrû vînenê. Esasê polîtîkayê xo de mesaj danê şarê Kurdî.”

 

Çalakîya 'keştîya azadîye'

 

Besîme çalakîya ‘keştîya azadîye’ hetê Înîsiyatîfê Azadîya semedê Abdullah Ocalanî yê Mîyanneteweyî dayê destpêkerdiş û bajarê Napolî yê Îtalyayî de peynî bîyo ser o wina vat: "Înîsiyatîfê Semedê Ocalanî Azadî, derheqê Ocalanî de xebatanê weş keno. Sendîkayê Îngîlîstanî ra bigirî, siyasetmedarê Latîn Amerîka, zanist, îdarekarê hukmatê kan, cinî, ciwanî semedê azadîya Ocalanî xebatan kenê. Bi xebatê tevgerê cinîyê kurdî û tevgerê kurdî dir hetê Însiyatîfê semedê Ocalanî Azadî sewîyeya dîplomatîk de xeylêk xebatî ameyî kerdiş û Keştiya Azadiye zî sey parçeyêk na xebate ame organîzekerdiş. 12ê teşrîna peyêne de peynî bî na çalakî diyarîyê roja ke Abdullah Ocalan şîyo Roma û prosesê komployî ame kerdiş. 22 serrî verê rolê Yunanîstanî yê hemverê komployî çi bi? Atîna de çi ame ciwîyayîş. Serê berpirsyarîyê hukmatê Yunanî de ame vindarnayîş."

 

'Merdimî wayîrê Birêz Ocalanî de vejênê' 

 

Besîme dewaê de wina vat: "Rolê DMME, CPT, Komîteyê Wezîran ê Konseyê Ewropayî estio. Sazîyê mîyanneteweyî, qanûnê ke Tirkîya îmza kerdê estê. Îtalyayî ra bigîrê heta Latîn Amerîka, serkeftişê Rojawanî ra tesîr bîyê. Demo ke merdimî nê vînenê, wayîr vejênê. Merdimî wayîrê ercnayîşê xurtî yê Birêz Ocalanî vejênê."

 

'Ganî CPT ra hêvî çinbo'

 

Besîme tewr peyîn wina vat: "Pêwa nê sîstemî îşkenceyê Îmraliyî CPT nêzdîbîyayîşêk cîya yo. Bi serran o CPT bi rêk û pêk nêşî Îmrali. Dem bi dem semedê nê çalakiyan kenê. Zehmet bo zî dem bi dem raporê înan bibi û semedê desturê Tirkîya çinbi no rapor nêameyî weşanayîş. CPT semedê îşkenceyê Îmraliyî çîyêk nêkeno. Pêwa îşkenceyê Îmraliyî qebûl keno zî çîyêk nêkeno. Ganî no rastî bêro teşhîrkerdiş û CPT ra hêvî nîna pawitiş. Heme kesê ke demokrasî wazenê ganî faşîzm ra vajê êdî bes o."