Rojda Aydin 

 

ŞIRNEX - Cinîyê Botanî, hemverê polîtîkayê ekonomî yê hukmatî ra bi reaksîyon ê û vatî: "Semedê polîtîkayê bîyaye ma êdî nêeşkenê debara xo bikerê û şêrê bazarê dayîşûgirewtişê rojane zî bikerê."

 

Krîzê ekonomîye ke tesîr serê temamê cuya welatijan keno, hemverê polîtîkayê îqtîdarî bi reaksîyon ê. Cinîyê Botanî, derheqê krîzê ekonomî de fikrê xo ardî ziwan û vatî, êdî nêeşkenê debara xo ya rojane zî bikerê.

 

'Krîzê ekonomî tewr zêde kûr beno'

 

Sereka Şubeyê Genel-Îşî yê Konfedarasyonê Sendîkayê Karkeran ê Şorişgir (DÎSK) ê Şirnexî Zeynep Îdîn, dîyar kerd ke no krîz newe nîyo û vat: "No krîzê ekonomî tesîrêk pîl serê Tirkîya de kerd. Bi taybetî zî herême zî bi tesîr bena. No krîz demê verê ra esto. La ewro na rewşe tewr kûr û giran bî. Lazim o heme partîyê sîyasî bêrê têhet û na rewşe rê çareserîyêk bivînê."

 

'Rewşa cinîyan tewr zêde xirab a' 

 

Zeynepe dîyar kerd ke no krîzê ekonomî bi taybetî tesîrê xo cinî û ciwanan kerdo û wina vat: "Tirkîya de dayeyê bêkarî xeylêk zêde yo. Cinîyê ke xebityenê zî heqê înan xeylêk kêm yeno dayîş. Cinî her hat ra ci ra tesîr benê. Cinî hem mitbex de hem tutî û hem zî keye ra ewnîyena. Berpirsîyarîyê cinîyan tewr zêde yo. Semedê nê zî tesîro tewr pîl cinîyan keno. Cinîyê ke nê prosesî de xebityenê zî nêeşkenê heqdestê xo bigîrê. Sewbîna no krîz tesîr serê ciwanan de zî keno. Kafe, dikan, market û xeylêk sektorê taybetî ameyî padayîş û hema zî yenê padayîş. Ciwanî nêeşkenê xo rê kar bivînê. Semedê nê zî ganî rêxistin û sazgehê sivîl kom bibê û na rewşe rê çareserîyêk bivînê. Welat welatê ma yo. Ganî ma vernîya na rewşe bigîrê. Vera ke rewşa welatê ma tewr zirab bibo, ganî ma çareserîyêk na rewşe rê bivînê. Vernê de ganî hukmat qebul bikero ke krîzêk ekonomî esto."

 

'Sebebê krîzî Erdogan bi xo yo' 

 

Besna Koçer zî qiseykerdişê xo de bale ant serê bêvengîyê hukmatî û wina vat: "No krîz tesîrêk pîl serê ma de keno. Ma nêeşkenê debara xo bikerê. Heme çî xeylêk vay bîyo. Ma neeşkenê dayîş û girewtiş bikerê û ne zî fatûreyê xo bidê. No krîz tesîrêk pîl serê cinîyan de keno. Heme kar û bar serê milê cinîyan de yo. Hukmat semedê şarî tu çareserî nêvîneno. Cuya ma ya verê qet nêbo hîn başêr bî. Rewşa Tirkîya xeylêk xira bîya. Sebebê nê zî Erdogan bi xo yo. Ma nêeşkenê xo biresnê tu çî. Cuya ma semedê ma zehmet bîya. Ma êdî nêeşkenê dayîşûgirewtiş bikerê û keyeyê xo rê çîyêk bigîrê."

 

'Ma êdî nêeşkenê dayîşûgirewtiş bikerê'

 

Hatûn Dayan zî wina vat: “Ma nêeşkenê keyeyê xo de dayîşûgirewtiş bikerê. Tu kar çin o tutê ma bixebityê. Kes nêeşkeno debara xo bikerê. Ma nêzanê ma do se bikerê. Çira heme çîyê xirabî yenê sereyê ma. Cuya ma êdî sey verê nîya. Ma mîyanê zulmî de ciwîyenê. Ma nêeşkenê şêrê bazar zî. Waştişê ma hukmatî ra oyo ke ganî çareserîyêk bivînê."