Sema Çaglak

 

AMED - Parlamentera HDPyî ya Amedî Dêrsim Dag dîyar kerd ke tecrîd polîtîkayê tewr pîl ê şerê taybetî yo û vat: "Eke sînorê polîtîkayê şerî yê taybetî çinbê o wext ganî sînorê ma bibê. Ganî ma sînoranê xo dîyar bikerê û bîyayîş bizanê. Wayîrê têkoşînê xo vejîyê."

 

Bajarê herême û metropolê Tirkîya de bi zanayîş ajanî, tiryakî û fuhuş yeno averşîyayîş. No çî yeno çarçewaya polîtîkayê taybetî yê şerî. Her bajarî de metodêk cîya yeno xebitnayîş. Derheqê babete de parlementera Partîya Demokratîke ya Şaran (HDP) ya Amedî Dêrsim Dag ajansê ma rê qisey kerd. 

 

Herême de polîtîkayê şerê taybetî

 

Dêrsime destpêkê qiseykerdişê xo de dîyar kerd ke polîtîkayê şerî yê taybetî herême de bêsînor û bêexlaq yeno kerdiş. Dêrsime dîyar kerd ke bi taybetî dimayê serra 2015ine nê kerdişî kewtî sewîyeya tewr corî û herême de hemverê Şarê Kurdî de yenê kerdiş. Dersime wina vat: “Demê Osmanîyan heta Komara Tirkîya politîkayê şerî yê taybetî hemverê Şarê Kurdî ame kerdiş. Gama ke ma heme bajarê Kurdîstanî ewnîyenê, vînenê ke ê kesê ke têkiliyê înan bi dewlete re esto, yan zî ê kesê ke rasterast hetê dewlete ra ameyê wezîfekerdiş, înan polîtîkayê lêşin hemverê erjê komelê kurdî kenê. Amed de zî wina yo, Colemêrg û Wan de zî wina yo. Rojê peyîn de reyna ma dî ke ê kesê ke bi dewlete dir têkîldar ê mîyanê komelê kurdî de senîn bêexlaqbîyayîşî vila kenê û senîn ê çeteyê fuhûşî awan kenê. Teşrîna Peyêne Colemêrg de zî înan ra nimûneyêk bi.” 

 

‘Ciwan û keye kampanya rê bi tesîr bî'

 

Dêrsime wina vat: “Gama ke ma meseleyê çeteyê fuhûşî yê Colemêrgî ewnîyanê zî sere de bi xebitnayîşê maddeyê hişbirî dest pêkerdo. Ma sey meclîsê Ciwanan ê HDPyî hemverê fuhûş û tiryakî kampanyayêk dayî destpêkerdiş. Semedê teşhîrkerdişê nê polîtîkayan na kampanya ameye destpêkerdiş. Çarçewaya kampanya de ma xo resnenê kesê ke tîryakî xebitnayî, kesê ke bîyê hacetê nê polîtîkayan. Ma bi keyeyê înan dir pêvînayîş kenê. Ma verê xo da dewe û taxan û ma xo resna bi hezaran ciwanan. Ciwan û keye kampanyaya ma ra tesîr bî.” 

 

‘Tecrîd polîtîkayê şerê taybetî yo’ 

 

Dêrsime dîyar kerd ke tecrîd polîtîkayê tewr pîl ê şerê taybetî yo û wina vat: "Semedo ke şarê Kurdî paradigma û perspektifê Birêz Ocalanî ra dûr bêrê vistiş, tecrîd bi hawayêke girankerde yeno kerdiş. Şerê taybet oyo ke bi her hawayî bêsînor û tu senciş çinî yo. Yeno waştiş bi tecrîdî dir a paradigmaya Birêz Ocalanî û mîyanê şarê Kurdî bêro akerdiş. Bi dûr vistişî amanc kenê ke têkoşîn tasfiye bikerê û çin bikerê. Polîtîkayê şerê taybetî kenê û tecrîd zî lingêk nê polîtîkaye yo. Semedê nê ma nêeşkenê vajê tu eleqeyê fihûş, tiryakî, kiştişê cinîyan bi tecrîdî dir çin o. Nê heme  metodî pîya yenê kerdiş û girêdayê yewbînan ê. Dewleta tirkî heme rayîr û metodê xo zorberdişê têkoşînê kurdan de xebitneno. Hem hetê kultur, hetê komel, sîyaset û cinîyan ra heme hêzê xo xebitneno. Tecrîd nênaskerdişê îradeyê Şarê Kurdî yo. Ewro bi mîlyonan kurdî vanê, ‘o rayberê min o’,  ‘o îradeyê min ê sîyasî yo’."

 

‘Wayîrê têkoşînê xo vejîyê’ 

 

Dêrsime wina qiseykerdişê xo qedêna: “Senîn ke ganî manaya tecrîdî teng nêro destgirewtiş ganî manaya  polîtîkayê şerî yê taybet zî teng nêro destgirewtiş. Lazim o ke ma zî nê ra baldar bibê. Ganî ma tarîx ra biewnê û serrê 90î biewnê ke nê polîtîkayê şerî yê taybetî bi hawayêke sistematik senîn ameyo kerdiş. Coka lazim o ke tewr zêde ma ewro wayîrê têkoşînê xo vejîyê.”