Marta Somek

 

STENBOL - Hunermend û avûkatî waştişê serbestveradayîşê Aysel Tugluk kerdî û vatî: "Qerarê ke semedê Aysele ameyî dayîş, sîyasî yê. Semedê Aysele ganî dewlete edalet bi ca bîyaro û Aysele mîyanê şert û mercê baş de bêro tedawîkerdiş." 

 

Serra 2016 de hemverê Kongreyê Komelê Demokratîke (KCD) operasyonêk bi ca ame û netîce de parlamenterê verî ya Partîya Demokratîke ya Şaran (HDP) Aysel Tugluk ameye tepiştiş. Aysele a roje ra heta ewro Zîndanê Kandirayî de ya. Demêk derg o rewşa aye weşîye xirab o. Pêwa raporê ke nêeşkena zîndanî de bimano nîna tehliyekerdiş. Her roja ke derbaz beno weşîye ci xirab bena.

 

Doktorê pisporî waştişê betalkerdişê ceza kerdî 

 

Avûkate Reyhan Yalçindag, demê vîyarte de bale ant serê rewşa Aysele û wina vatibi: "Dimayê ke dayîka Aysele dinyaya xo bedilnaye, weşîya Aysele xira bî. Aysele êdî serê hişê xo de nêbî. Êdî nêeşkayîne karê xo yê rojane bikero. 8 mengan Aysele hetê doktorê pisporî yê Serekîya Beşê Tibê Edlî yê Fakulteyê Tibê yê Kocaelî de ameye muayenekerdiş. Doktoran tespîtê 'Nêweşîyêke kronîk a û aver şina, şert û mercê zîndanî de nêeşkena paştdayîşê tibî bigîro, no çî do bibo sebebê nêbaş. Ganî cezaya Aysele bêro betalkerdiş.'

 

Embazê Aysele yê avûkat û hunermendî bale antî serê rewşa Aysele û waştişê serbestî kerdî.

 

'Aysele ganî serbest bêro veradayîş'

 

Hemsereka Pêroyî yê Komeleya Heqê Merdiman (ÎHD), Eren Keskîn, dîyar kerd ke bi serran o Aysele korîdorê Dadgehê Asayîşê yê Dewlete (DGM) têkoşînêk dayê û vat: "Aysele dimayê ke dayîka xo vînî kerd, rewşa ci giran bî. Hetêk ma yê hempar esto, ma zaf girêdayê dayîkê xo bî. Çi heyf, demê Aysele zîndan de bî dayîka xo vînî kerd. Goristanê dayîka aye bi hêrişê nîjadperestî dir rî bi rî manenê. No çî tesîrê serê Aysele kerd û travmayê ke cuyaya tesîr serê hişê ci kerd. Aysele merdimêke zaf cîyaya û nêwazana vejîyo vernî û semedê nê zî nêweşîya xo demêk derg nimna. Goreyê pêkerdişê ke Tirkîya îmza kerdê, ganî Aysele serbest bêro veradayîş." 

 

'Lazimîyê Aysele bi moral esto'

 

Aysel Tugluk awankerdoxê Weqfê Cigêrayîşî Huqûq û Komelî (TOHAV) ya. Sereka pêroyî ya TOHAVî Dîdar Erdem zî wina vat: "Menga êlule de ma şî serdayîşê Aysele. La çi heyf mîyanê serrêke de sey 20 serrî emrê ci derbaz bibî. Ma dî ke rewşa aye baş nîya. Semedê nê nêweşî dermananê giran gêna û no zî tesîr serê rewşa aye de keno. Bi serdayîşan û bi moralî do rewşa aye baş bibo. La semedê problemê şîyayîş û ameyîşî serdayîşî nînê kerdiş. Xêrcê avûkatan kesêk bîn nêgînê pêvînayîş. La lazimîyê Aysele bi moral esto. Ma hêvî kenê ke ATK fek raporanê xo vera bido. Ganî prosesê tedawîye dest pêbikero."

 

'Ganî şert û mercê başî de bêro tedawîkerdiş'

 

Belgîn Şahîn ke hunermendîya fotografantişî kena derheqê rewşa Aysele de wina vat: "Birêz Aysel Tugluk serra 2016 ra heta ewro tepişte ya. Demo tepişte bî, dayîka ci dinyaya xo bedilnaye û dima ra hêrişê cenazeya dayîka aye kerdî. No çi tesîrê weşîye ci kerd. Aysele bi nê rengî nêeşkena cuya xo dewam bikero. Ganî Aysele bêro veradayîş. Pêwa raporê ke nêeşkena zîndan de bimano zî nîna tahlîyekerdiş. Ganî Aysele mîyanê şert û mercê başî de bêro tedawîkerdiş."

 

'Qerarê ke semedê Aysele ameyo dayîş sîyasî yo'  

 

Derhêner û senarîst Yeşîm Ustaoglu zî vengdayîşê serbestveradayîşê Aysele kerd û vat: "Ganî Aysele bêro tehlîyekerdiş. Keyeyê xo de bêro tedawîkerdiş. Ganî edalet bi ca bêro. Sewbîna qerarê ke derheqê Aysele de ameyo dayîş sîyasî yo. Ganî siyaset tewrê edaletî nêkerê."