AMED - Sekretera Şubeyê Hûmara 2yê DÎSKî Hanîfe Kardaş derheqê zamê bi enflasyonî dir zêde bîyo û problemê ke yenê ciwîyayîş de qisey kerd û vat, welat nîno îdarekerdiş û welat roj bi roje ver bi feqîrî şino.

 

Tirkîya de krîzê ekonomî her ke şino pîl beno. Hemverê dolarî ke 13 TL derbaz kerd, lîrayê Tirkî her ke şino erjê xo vînî keno û seranserê welatî de şar derheqê ameyoxî de endîşeyîn o. Dolar ke hewteyê vîyarte de berz bi, ci dir vayîye her çî zêde bî. Şar bi sloganê, ‘Ma nêeşkenê debare bikerê’ vejîyayî kuçeyan û hukmat zî bi israr o vengê şarî nêeşnawo.

 

Sekretera Şubeyê Humara 2yîn Sendîkayê Karkerê Şorişgêr (DÎSK) Hanîfe Kardaş derheqê zamê ameyo kerdiş de û krîzê ekonomî de ercnayîş kerd û dîyar kerd ke ameyoxê welatî tarî yo.

 

'Şar nêzano se bikero'

 

Hanîfe wina bale ant serê prosesî û vat: “Welat de enflasyon her ke şino zêde beno. Gramê zerdî bîyo 780, tenekeyêk rûn bîyo 500 û çuwalêk ardan zî bîyo 400  TL. Şar hemverê zamê ke yeno kerdiş de bêçare mendo. Heta ke şar pîya veng nêvejo, do problemî tewr giran bê. Semedê nê zî ameyoxê welatî roşn nîyo."

 

Hanîfe dîyar kerd ke polîtîkayê şerê taybetî yê ke îqtîdarê AKP û MHPyî hemverê şarê Kurdî keno zî tesîr serê ekonomî keno û vat: "Serebûtê komelî bi qasê ke tesîr sîyasetê zereyî keno yê teberî zî keno. Hukmatêk ke bi vatişê, ‘şima bi dolar maaş gênê' yarîye xo bi şarî dir keno esto. Belê ma bi dolar meaş nêgînê la meaşê ke bi lîrayê Tirkî gênê, semedê zêdebîyayîşê vayîye qîm nêkeno. Bêguman şar tehemulê na rewşe nêkeno û do vengê xo berz bikero. Wa îqtîdar nêfikîrîyo ke na rewşe do wina dewam bikero. Dayeyê feqîrî do welatî de hîna zêde bibo."

 

'Bi 100 lîra sebze fêkî nîno girewtiş' 

 

Hanîfe bale ant serê zamê ke yeno kerdiş û vat: "Şar semedê zamî, nêeşkeno dayîş û girewtiş bikero.  Xeylêk kesî ver bi şanî şinê bazar û berardişê serê tezgahan de mendê gênê. Verê bi 100 lîra merdimî şîne bazar û pere mendêne la nika bi 100 lîra sebze û fêkî nîno girewtiş. Meaşê asgarî di hezar û 200 yo. Şar do bi nê kîra bido, fatureyan bido yan zî dayîş û girewtiş bikero. Şar nê ser de krediyan anceno û nêeşkeno bido. Wa bêrê bikewê mîyanê şarî, wa bivînê ke çi yeno ciwîyayîş."

 

'Ganî her kes wezîfeyê xo bi ca bîyaro' 

 

Hanîfe tewr peyîn wina vat: "Sendîkayan semedê feqîrî û krîzê ekonomî qerarê grevê pêroyî girewtê. Derheqê babete de her ca de ma eşkerîyaye da. Ganî her kes hemverê nêheqîyê ke welat de yenê ciwîyayîş, vengê xo berz bikero. Ganî rêxistinê komelê sivîl û sendîka wezîfeyê xo bi ca bîyarê. Ma sey sendîka do hemverê probleman meydanan de bê. Ma do têkoşînê xo dewam bikerê."