Derya Ren

 

AMED - Rabîa Ataş, tewrê çalakîya "Semedê tepişteyê nêweşan nobeta edeletî” bî, dîyar kerd ke selahîyetdarê dewlete ci gêrayê û veng dayê verê awanîya HDPyî yê Amedî û vat: “Tutanê ma HDPyî nêberd. Tutê ma zulm ra remayî. Nika zîndan de binê zulmî de yê.”

 

Merdimê tepişteyan bi amancê bale biancê serê rewşa tepişteyê nêweşan û veşnayîşê înfazan û nêtehlîyekerdişê tepişteyan, 16ê teşrîna peyêne de awanîya Baroya Amedî de çalakiya "Nobeta Edeletî" dayî destpêkerdiş. Roja ke çalakî ameya destpêkerdiş, merdimê tepişteyan Încî Guler Altindag, Hasîme Guler, Fevziye Kolakan, Reşayet Ada, Hakki Boltan çalakî de ca gênê. Çalakiya tepişteyan roja 15ine de dewam kena. Vizêr dayîka tepişteya bi nameyê Şîvekar Ataş ke zîndanê Cinîyan ê Bakirkoyî de tepişteya, Rabîa Ataş tewrê çalakî bî. Şîvekar ke nêzdîyê 6 serrî yo tepişte ya, Rabîa Ataş dîyar kerd ke wa kênaya ci û heme tepişteyî bêrê veradayîş û no zulm peynî bo.

 

‘Tepişteyî bi rojan hucre de yenê tepiştiş’

 

Rabîa qalê kênaya xo kerd û vat, bi pandemî dir tepişteyan nêberdê nêweşxane û “Kênaya mi nêeşkena hucreyê yew kesî de bimano. Semedê nê şîyayîşê nêweşxanî red kena. Kênaya mi hema 25 serrî ya. Eke ciwan nêbîne, nika dinyaya xo bedilnabî.  Dewlete heme çeteyan vet. La tutê ma bê suc zîndanan de tepişnenê. Kênaya mi wendekar bî û ameye tepiştiş. Yewin sebebê tepiştişê ci wayîrvejîyayîşê kultur û ziwanê ci bi. Homayî ma kurd viraştê. Ma do bi ziwanê xo bimirê.”

 

‘Tutê ma zulm ra remayî’ 

 

Rabîa sebebê tewr bîyayîşê xo wina vat: “Ganî edalet bêro. Dewlete mi gêrena û vana bê verê awanîya HDPyî yê Amedî. Ez şêrî uca se bikerî? Tutanê mi destê mi ra girewtî. To înan tepişt û zulm kerd. Semedê nê tutê mi şinê. Ez şêrî verê HDPyî se bikerî. Vanê ke, ‘şore verê HDPyî tutanê xo biwaze.’  HDP tutanê mi nêbeno cayêk. Tutê mi zulm ra remayî. Kênaya mi hema wendekar bî. Çira hende ceza dayê.”

 

‘Ez o heta peynî bêrî çalakî’ 

 

Rabîa wina qedêna: “Dewlete bi zanabîyayîş ma kerdê na rewşe. Ganî her kes paştdayîş bido na çalakî. Xêrcê edeletî waştişêk ma bîn çin o. Ganî tutanê ma serbest vera bidê. Pêwa ke cezaya tepişteyan qedêna vera nêdanê. Zîndanan vurnayê  goristan. Wa her kes bêro paştdayîş bido ma. Wa tutanê ma vera bidê ma înan derman kenê. Ez o heta peynî bêrî çalakî. Ez semedê tutanê xo heta peynî destê mi ra çi bêro ez o bikerî.”