AMED - Sîyasetmedarê cinî dîyar kerdî ke padayîşê HDPyî eynî wextî de birnayîşê heme vengê muxalîfan o û dîyar kerdî ke bîyayîşê HDPyî hêvî dano heme şaran û bingehê cuyêka hempar û têduşt awan keno.

 

Partîya Demokratîke ya Şaran (HDP), semedê problemê Tirkîya yê sîyasî, ekonomî û komelî safî bikero û welatêk demokratîk awan bikero, kewt rayîr. Roja ke ameyo awankerdiş heta ewro bajar, qeza, dewe û kuçeyan de bi şarî dir, bi rêxistinê komelê sivîlî dir, bi partî û sazî û dezgehan dir, bi kal û pîran,  bi kedkar û esnafan, bi cinî û ciwanan dir kom bi. Pandemî, laser, ziwatî, bêkarî, ekonomî, feqîrî, gendelî, nîjadperestî, cinsperestî, qedexe, zordestî û şîdet, desteştiş her wext bi rojeva HDPyî. Sewbîna bi muxalefetbîyayîşê xo yê hemverê îqtîdarî zî bi hedefê sereyîn. Hemserek, hemşaredar, îdarekar, endam û xebatkarê partî ameyî destbendkerdiş û tepiştiş. Pêwa teda û zordarî zî têkoşîn rê tawîz nêda. Derheqê tedayê hemverê HDPyî siyasetmedarê cinî yê Amedî qisey kerdî.

 

'Padayîşê HDPyî problemê heme vengê muxalifan o'

 

Hemşaredara Erxanî ke vera ci qeyûm ame tayînkerdiş Meryem Yildiz, dîyar kerd ke padayîşê HDPyî eynî wextî de birnayîşê vengê heme muxalifan o û vat: "Padayîşê qerarê HDPyî êdî rewşêke ke padayîşê partîyêk sîyasî derbas bîyo yo. Semedo ke faşizm her ke şino bi rêxistin keno û keweno tewr cor. Gama ke ma hetê sîyasetê Tirkîya ra ewnîyenê padayîşê HDPyî birnayîşê heme vengê muxalifan o. Yanî îqtîdaro bîyaye vano; kam nêro rêzê sîstemê yewperestî do bêro çinkerdiş. Îqtîdar semedo ke problemê komelî nêrê munaqeşekerdiş û nêkewê rojeve, xo rê tim rojevan vîneno. Tewr zêde rojeva xo serê kurdan de kenê. Yanî HDP Tirkîya de sey qozêk yeno xebitnayîş."

 

'Têkoşînê ma kuçeyan de yo'

 

Meryeme dewam de wina vat: “Vanê qey demo ke HDP bêro padayîş do sîyasetmedarê HDPyî keyeyê xo de roşê. Bêgûman çîyêk winasî çin o. Xeyêk rey partîyê ma ameyî padayîş û yê newe ameyî akerdiş. Êdî hesabê înan yê derheqê HDPyî û kurdan yewbînan nêgînê. Semedo ke rewşa ma ya ewro de tena şarê Kurdî nê îqtîdarî rê razî nîyê, pêro şarê Tirkîya razî nîyê. Padayîşê HDPyî nîno manaya ke îradeyê kurdan bêro şikinayîş û kurdî cayê xo terk bikerê. Eksê ci kurdî tewr zêde xurt benê. Têkoşînê ma kuçe û meydanan de pîl beno. Têkoşînê ma binê sîwanê awanîya partî de yo. Adetê têkoşînê ma yê sîyasetî bi awanîyan sînor nîyo. Eke awanîyê ma bêrê padayîş zî do têkoşînê ma kuçe û meydanan de dewam bikero."

 

'HDP hêvî dano şaran'

 

Hemseroka HDPyî ya Êlîhî Fatma Ablay zî vat, HDP hêvî dano heme şaran û vat: "HDP pawitişê heqê heme kesê bindestan keno. Bi taybetî zî serê pawitişê cinîyan de aver berdo. Cinîyan bi têkoşînê xo ewro bîyê xeylêk destkewtişan. La îqtîdaro serdest ê ewro wazeno ke çinhesibnayîşê nê destkewtişan sîstemê xo awan bikero. Coka ma cinîyî HDP de ca gênê. Her çiqas îqtîdarî zulm bikerê zî cinîyê kurdî hemverê nînan de vînî nêkerdî. Amancê HDPyî cuyêka têduşt û azad o. Yanî HDP wazeno semedê şarê bindestî û rengan bibo wareyê cuyêka hempar."

 

'HDP çareserî yo' 

 

Fatma tewr peyîn wina vat: "Nê prosesî de ma bi giranî xebatê xo şarî dir kenê. Yanî ma persê xo sey ‘şar çi wazeno’, ‘ma senî eşkenê şarî rê bibê cewab.'  Her 4 parçeyê Kurdîstanî zî aseno ke şar bi têkoşîn û xoverdayîşê xo serê lingan de yo. Polîtîkayê dewlete yê ke serrê 90î de hemverê kurdan de kerdêne nêvuryayê. O wext zî dewî ameyîne veng kerdiş nika zî wina yo. Heskîf de bi qirkerdişê ekolojîk dir welatijê uca koç kerd. Hayeyê ma nê polîtîkayê lêşinan ra esta û heta ke HDP bibo ma do hemverê nê polîtîkayan têkoşînê xo dewam bikerê. Ma do zorê nê polîtîkayan berê û serbikewê."