COLEMÊRG - Aktivîsta TJAyî Seyhan Başak ke Colemêrg de bi îddiayê "endamîya rêxistine" ameyîne muhakemekrdiş, roniştişê yewin de ameye tehlîyekerdiş. 

 

Yewin roniştişê dewaya aktivîsta Tevgerê Cinîyan ê Azadan (TJA) Seyhan Başak 2yîn Dadgeha Cezaya Giran ya Colemêrgî de ame vînayîş. Avûkatê endamê Komeleya Huqûqnasê semedê Azadî (OHD) û Komeleya Heqê Merdiman (ÎHD) beşdarê roniştişî bî. Seyhane zî Zîndanê Cinîyan ê Amedî bi rayîrê Sîstemê Dîmen û Vengî (SEGBÎS) beşdarê roniştişî bi.

 

'Semedê pawitişê bi ziwanê dayîke ez mecbûr menda pere bidî'

 

Dimayê tespîtê nasnameyî Seyhane waşt bi kurdkî pawitiş bikero nê ser de serekê dadgeh wina vat: "Ti bi tirkî zana labelê ti wazena bi kurdkî pawitiş bikerê. Berdêlêk nê esto. Ganî ti heqê tercumanî bidê." Nê ser de Seyhane wina vat: "No ziwanê dayîka min o û ez mecbûr nîya semedê nê pere bidî. Ez o bi ziwanê dayîka xo pawitişê xo bikerî."

 

'Şima wazenê pawitişê bi ziwanê dayîke werte ra wedarnê' 

 

Avûkatê OHDyî zî hemverê helwestê serekê dadgehe de wina vatî: "Şima wazenê pawitişê bi ziwanê dayîke bi tehdîdê maddî werte ra wedarnê."

 

Heyetê dadgehe dimayê munaqeşeyî mabêne da roniştiş. Dadgehe dimayê mabêne qerarê xo eşkera kerd. Dadgehe qerar da ke bi bahaneyê, "Vurnayîşê wesfê sûcî" Seyhane bi şertê kontrolê edlî bêro veradayîş. 

 

Roniştiş taloqê 10ê Kanûne ame kerdiş.