Rojda Aydin

 

ŞIRNEX - Cinîyê sîyasetmedarî, derheqê 25ê Teşrîna Peyêne de ercnayî,ş kerdî û vatî ke ê do hemverê hêriş û zulmî serê cinîyan de yeno kerdiş 25ê teşrîna peyêne wareyan de bê û vengê xo tewr berz bikerê.

 

Patria, Minerva û María Teresa ke sey 3 wayê Mîrabal yenê binamekerdiş; komara Domînkî de hemverê Rahafael Turujîllo ke serra 1930î de heta 1961 de  Komara Domînîkî de dîktatorîyê xo dewam kerd, têkoşîn kerdî û no têkoşînê înan yê bêhempa temamê welatî de vila bi. La semedê nê têkoşîno ke dayî 25ê Teşrîna Peyêne serra 1960î de hetê polîsê dîktatoriyê Turujîllo ra wesayîtê înan ame vindernayîş û 3 wayî  Mîrabal û şoforê înan ameyî qetilkerdiş. Semedê nê roja qetilkerdişê hîrê wayan 25ê Teşrîna Peyêne Roja Têkoşînê Hemverê Şîdetê Cinîyan ê Dinya ame îlankerdiş û a roje û dima çar hetê dinya de şîdetê cinîyan rê yeno kerdiş bi çalakîyê girseyî yeno şermezarkerdiş. Sey her cayê dinya Kurdistan de zî bi hezaran cinî amadekarîya na roje kenê û 25ê Teşrîna Peyêne de şîdetê cinî şermezar kenê.

 

Cinîyê sîyasetmedarî, derheqê şîdetê ke cinîyan rê yeno kerdiş û çalakîyê semedê 25ê Teşrîna Peyêne de qisey kerdî û vatî vengê xo berz bikerê.

 

'Hetê fikr û fehmî de zî hêri​şî cinîyan kenê'

 

Hemşaredara Cizîrî ke vera ci qeyûm ame tayînkerdiş Bêrîvan Kutlu, ard ziwan ke hêriş û şîdetî cinîyan her kee şino zêde beno û wina vat: "Cinîyan bi xoverdayîş û têkoşînê xo xeylêk destkewtişî bi dest kerdî. La hêrişê destkewtişê înan ame kerdiş û cinî hemverê nê zî têkoşînê xo dewam kenê. Sewbîna hêrişê serê cinîyê polîtîk ê. Nimûneyê ci zî hêrişê Pêkerdişê Stenbolî ke cinîyan bi xoverdayîşê xo bi dest kerdib. Welat ke sere de nê pêkerdişî îmza kerdibi Tirkîya bi û yê ke vernî de xo ant reyna Tirkîya ya. No zî nîşan dano ke Tirkîya rastîyê xo de tu wext cinî nas nêkerda. Semedo ke Tirkîya hemverê têkoşînê cinî de şerêk xurt kerdo. Erdogan rastîya xo nîşan kerd. Pêkerdişê Stenbolî tu wext welatê ma de bi ca nêameyo û şîdetê cinî dewam kerd. Sewbîna hetê fikr û fehmî de zî wazenê qir bikerê. Qirkerdişêk zef hetî serê cinîyan de yeno kerdiş."

 

‘Pêkerdişê emsar do xurt bo’

 

Bêrîvane, dîyar kerd ke kiştoxê cinîyan nînê cezakerdiş yenê veradayîş û wina vat: "Semedê polîtîkayê bêcezabîyayîşî her roje cinî yenê qetilkerdiş û hêrişê înan yeno kerdiş. Kiştişê cinîyan meşrû yeno vînayîş. Cinîyê ke îdarekarê AKPyî de ca gênê bi mezgê AKPyî têgêrenê. La hemverê nê hemine zî xoverdayîşêk bê hempa cinîyan esto. Cinî hemverê betalkerdişê pêkerdiş Stenbolî de kuçeyan de bî û vengê xo berz kerdî.  Hêrişê sey tacîz, tecawuz, şîdetî û kiştişê cinîyan her ke şino zêde beno. Nê hêrişî bi destê çeteyan AKPyî û bi zanebîyayîş yenê kerdiş. Ma sîyasetmedarê cinî yê kurdî ma do nê  25ê teşrîna peyêne zî û dimayê nê zî  meydanan de bê û heta ê game peyser bierzê do xoverdayîşê ma dewam bikero. Eke ma xo ver nêdê do nê hêrişî  tewr zêde bibê. Nê 25ê Teşrîna Peyêne de mesajê emsarî do xurt bo. Îqtîdarê AKPyî bê çaretîyê xo rê tawîz nêdano. Semedo ke dadgehan de vera ke camêrdî bêrê muhakemekerdiş cinî yenê muhakemekerdiş. Muhakemekerdişê nê camêrdan zî do bi têkoşînê cinîyê kurdî û cinîyê ke heqê xo nas kenê bi ca bêro."

 

'Îqtîdar kiştişê cinîyan meşrû vîneno'

 

Hemsereka HDPyî ya Cizîrî Zilan Ecevît zî dîyar kerd ke ewro zî bi minasebetê  25ê teşrîna peyêne wareyan de bê, vengê xo berz bikerê û wina vat: "Ma ewro bi minasebetê 25ê Teşrîna Peyêne meydanan de yê. La tena 25 teşrîna peyêne de ney, herdem cinî semedê heqê xo meydanan de yê. Dimayê betalkerdişê Pêkerdişê Stenbolî tacîz, tecawuz, şîdet û qirkerdişê cinîyan tewr zêde bîyo. Tirkîya her roje cinî bi destê camêrdan yenê qetilkerdiş. Cinîyê ke yenê qetilkerdiş, semedê nê edaletî bi ca nîno. Kiştoxê ke cinîyan qetil kenê bê ceza yenê verdayîş û serbest yenê verdayîş. No çî zî kiştişê cinîyan zêde keno. Îqtîdar kiştişê cinîyan meşrû beno. Heqê cinîyan nîno  pawitiş. Semedê nê hêrişê hemverê cinîyan zêde benê. Ma do ewro 25ê Teşrîna Peyêne de hemverê şîdetî  meydanan de bê. Ma do hemverê  îqtîdarê AKP-MHPyî û camêrdê serdestan heqê xo bipawê û wareyan de vengê xo berz bikerê.  Semedê 25ê teşrîna peyêne plansaziyê ma estê û ma do cinîyan dir bêrê têhet. Ma veng danê cinîyan kenê bêrê û ma vengê xo pîya tewr berz bikerê û hemverê hêrişan bibê asteng."

 

‘Tirkîya de edalet semedê cinî û tutan çin o'

 

Endama Meclîsê Şaredarîya Silopî Garîbe Bîlîr zî wina vat: "Hemverê şîdetê ke yeno kerdiş û qirkerdişê cinîyan de bêveng nêmanê û ma do wareyan de bê. Ma hemverê nê hêrişan têkoşînê xo girs bikerê. Dimayê betalkerdişê Pêkerdişê Stenbolî hêrişê serê cinîyan xeylêk zêde bî. Sewbîna sebebêk bîn ê zêdebîyayîşê nê şîdetî zî bêcezaverdişê kerdoxan o. Îqtîdar semedê vernîya şîdetê cinîyan bigîro çîyêk zî nêkeno. Tirkîya de edalet çin o. Wazenê wareyê cuye cinîyan rê teng bikerê. Ma cinî her roje xo ver danê û ma do xo ver bidê zî. Tena 25ê Teşrîna Peyêne de ney her ca de û her wext têkoşînê cinîyan do dewam bikero. Ma cinîyê Botanî ma do hemverê zulm û zorî de wareyan de bê."