AMED - Roniştişê dewaya ke Nurcan Yalçin ci ra ameyîne muhakemekerdiş de, dadgehe  bi îdayê "bi zanebîyayîş û bi waştişê xo hetkarîya bi rêxistine dir kerda"  û "propagandayê rêxistine" kerda 3 serrî 7 mengî û 22 rojî cezaya zîndanî Nurcane rê da.

 

Roniştişê qerarî dewaya ke Nurcan Yalçin çarçewayaa cipersayîşê derheqê Komeleya Cinîyan a Rosayî de bi îdaya "endamîya rêxistine" û "propagandaya rêxistine kerda" amebî akerdiş, 9in Dadgeha Cezaya Giran ya Amedî de ame vînayîş. Nurcane tewrê roniştişî nêbî la avûkatê ci Resul Temur roniştiş de amade bi.

 

Roniştişê ke bi tespîtê nasnameyan ame destpêkerdiş de makamê îdayî waştiş kerd ke Nurcane "endamîya rêxistine" û "propagandaya rêxistine" ra bêro cezakerdiş.

 

'Ganî serê îfadeyê kesê nimte tu kes nêro muhakemekerdiş'

 

Dima ra avûkat Resul Temur heqê qiseykerdişî girewt, vat ke ê mutalayê makamê îdayî qebûl nêkenê, înan îfade bi nuşteyî pêşkêşê dadgehe kerdê û tu cipersayîşêk ke derheqê muwekîle ci de bêro destpêkerdiş çin o. Resulî vat, "Cigêrayîşê ke ameyo kerdiş de endamîya muwekîla ci ya komeleyî dewam kena û semedê nê cipersayîş ameyo destpêkerdiş. Tîya de endemîya muwekîla min a komeleyêke fermî ameyo cipersayîş. Heqêkê qanûnî sey suc bo ameyo ercnayîş. Ganî tena serê îfadeyê kesê nimte tu kes nêro muhakemekerdiş."

 

'Tu rewşêka sucdarkerdiş çin a'

 

Resulî ard ziwan ke qeydê muwekîla ci ya SGK ke ça de xebitêna esto, îfadeyê kesê nimte zûr o û vat: "Muwekîla mi rojnameger a. Demo ke derheqê ci de cipersayîş ameyo destpêkerdiş de şîrketê produksiyonî de xebityena. Semedê nê zî muwekîla mi eşkena bikewo xeylêk wareyan û xeberan taqîb bikero. Tu rewşêke muwekîla mi ke ci ra bêro sucdarkerdiş çin o û ez beraetê muwekîla xo wazena."

 

Cezaya zîndanî dayê

 

Heyetê dadgehe dimayê mabêne  ke da Nurcane bi îdayê "bi zanebîyayîş û bi waştişê xo paştdayîş daya rêxistine" 2 serrî û mengêke cezaya zîndanî da, bi îdayê " propagandaya rêxistine kerda" zî serrêke 6 mengî û 22 rojî cezaya zîndanî da. Bi pêroyî heyetê dadgehe Nurcane rê 3 serrî 7 mengî û 22 rojî cezaya zîndanî da.

 

Sewbîna dadgehe derheqê Nurcane de qerarê qedexeyê kontrolê edlî zî da.