Oznur Deger

 

ENQERE - Dr. Fîlîz Yildirim ke netîceyê şîdetê camêrdî de têkoşînê cinîyan nas kerd, hemverê camêrdê ke fek ci ra vera dayo têkoşînê huqûqî dana. Fîlîze vat: "Semedo ke vengê xo bidî eşnawitiş gerek ez bimirî?" Fîlîze mesajê ‘sere metewênê' da cinîyan.

 

Şîdetê serê cinîyan de roj bi roje giran beno û her roje cinî yenê qetilkerdiş, tecawuzkerdiş û tacîzkerdiş. Goreyê dayayê ajansê ma 10 mengê ewil yê 2021 de tewr tay 253 cinî ameyî qetilkerdiş, 150 bi guman dinyaya xo bedilnayê. Doktor Fîlîz Yildirim bi serran o rastê şîdetê mêrdeyê xo ameya û semedo ke biciwîyo pawitişê xo yê cewherî xebitna û bi têkoşîn cuya xo dewam kena.

 

Fîlîze Nêweşxaneyê Dewletî ya Polatli xebitêna û 2018 de rastê şîdetê mêrdeyê xo Îbrahîm Kutluer yena û bi xêrê pawitişê cewherî xo xelas kena. Semedo ke gumanbar xo ra dûr fînena yena muhakemekerdiş.

 

Hetêk ra camêrd hetêk ra zî huqûq

 

Fîlîze bi saetan rastê şîdetê gumanbarî yena, dima ra dewaya veradayîşî akena, sewbîna sucê, ‘şîdetê hemverê mêrdeyî' ‘heqaret’, ‘tehdîdê bi çekî’ dewa akerd. 7in Dadgeha Asliyeya ya Bati Anqara sucê ‘heqaret’, ‘tehdîdê bi çekê’ gumanbar berat kerd. sucê ‘qestî birîndarkerdiş’ ra serrêke û 9 mengî ceza da. Demo ke Fîlîze rastê şîdetî amebî, pawitişê cewherî xebitna û milê gumanbarî gaz kerd. No sey  tehrîkê bêheq ame hesibnayîş. Vistişê ceza ame kerdiş û vistî serrêke û mengêke û 15 rojan.

 

Dosya şî cezaya giranî 

 

Gumanbarî derheqê Fîlîze de semedo ke milê ci gaz kerdibi, 7in  Dadgeha Cezaya Asliye ya Anqarayî de dewa akerd. 10ê teşrîna peyêne de dosya ke gumanbar ci ra ameyîne muhakemekerdiş şî Dadgeha Cezaya Giran û do gumanbar Cezaya Giran ra bêro muhakemekerdiş.

 

Fîlîze bi wesîleyê 25ê teşrîna peyêne Roja Têkoşînê Hemverê Şîdetê Serê Cinîyan ê Mîyanneteweyî de ajansê ma rê ercnayîş kerd.

 

'Dimayê şîdetî mi girîngî fam kerd'

 

Fîlîze bale ant serê 25ê teşrîna peyêne û vat: “Dimayê ke rastê şîdetî ameya mi girîngiyê 25ê teşrîna peyêne fam kerd. Televîzyonan de demo ke xeberê şîdetî vejîyayîne mi vurnayîne. La çi heyf ame sereyê mi zî. Şîdet 2018 de dest pêkerd. Gumanbar menga Nîsane de verê çimanê di tutanê mi de şîdet bi mi kerd. A roje tutan nêewnîyayîne mi ra ez nika merde bîya. Demo ke şîdet kerdêne, mi hewl dayîne ez ey bêveng bikerî. Demo ke kardî ante mi, mi vat ez o bimirî. Mi tena tutanê xo ra ewnîya. Ez cuyaya, la edaletî ez kerda gor. Vengê mi nêame eşnawitiş. Ez rincan bîya. eke ez doktor nêbîne, ez xurt nêbîne, ez dayîk nêbîne. Beno ke mi reyna vînî kerdêne. Mi xeylêk rey vînî kerd. La bi xêrê heskerdişî û tutanê xo serê lingan de ya. Ez mexdur bîya la yê hemverê mi mexdur ame vînayîş."

 

'Semedê vengê xo bidî eşnawitiş ganî bimirî'

 

Fîlîze bale ant serê prosesî û wina vat: "Eke delîl û tespît, şahidê a roje çinîbîne, ez o sucdar biameyîne vînayîş. Na rewşe tewr zêde mi bêzar kerd. Proses hema dewam keno. Dewa şawitî dewaya giran.  Gelo semedo ke vengê xo bidî eşnawitiş ganî ez bimirî? Pêwa hende dem derbaz bi hema zî mi serebût serê xo ra nêeşto. Demo ke şîdet bi mi kerd, semedo ke xelas bibî, mi pawitişê cewherî kerd, mi milê ci gaz kerd. Saetêke şîdet bi mi kerd. Ez xora nêeşkayîne wurzî serê lingan. Darbe dabi sereyê mi ro."

 

'Mêrde tehdîd kerd polîs bêveng mend'

 

Fîlîze wina dewam kerd: “Verê polîsan de gumanbarî heqaret bi mi kerd. Polîsan veng nêkerd. Tehdîdê, ‘ti do bivînê, do kes dorê to de nêmano kerd.' Pêwa nê polîsan çîyêk nêkerd. Mi merkezê vernîgirewtişê şîdetî cinî dî û mi o wext paştdayîş hîs kerd û mi hêzê têkoşînî dî. Pşatdayîş zaf girîng o. Prosesê hukmî de mi hîn kêmî dî. Çi heyf edalet kîşte cinîyan de nîyo. Bi 4 serrî yo têkoşîn kena û peynî de ez bîya gumanbar.”

 

'Ceza çin a'

 

Fîlîze bale ant serê şîdetî û vat: "Gumanbar çira nêame tepiştiş? Ez bi mengan nêeşkayîne şêrî kar. Ez bi rojan nêameya serê xo. Her di tutê mi zî travma ciwîyayî. Tutê mi derb werdî, reyna çîyêk nêkerdî. Verê çiman de şîdet dewam keno. Dewa reyna şî cezaya giran. Nêmendib ez cezaya giran ra bêrî muhakemekerdiş. Ez nêzdîyê 10 rey bîya gumanbar la o di rey serê kursîyê gumanbarî de ronişna."

 

'Ez semedê cinîyan tîya ya'

 

Fîlîze tewr peyîn wina vat: "Xeylêk kesî vatêne, ‘proses derg meke', ‘Her kes nê ciwîyeno.' Rêxistinê min ê meslegî, nêweşê mi, heskerdoxê mi paştdayîş dayî mi. Ez semedê her di tutanê xo û heme cinîyan tîya ya. Ez bi wesîleyê 25ê teşrîna peyêne nê mesajî dana cinîyan. Wa xurt bê, nêtersê, sere nêtewênê. Paştdayîşê psîkolojîk bigîrê. Girêdayê kesî nêbê. Heqê kesî çin o şîdet kesî bikerê."