WAN - Merdimê tepişteyan û Dayîkê Aştîye yê Erdîşî waştî tecrîdê serê Rayberê PKKyî Abdullah Ocalanî bêro wedaritiş û vatî: "Şarê Kurdî ke binê teda û zordarî de têkoşîn keno, do tecrîd biqedênê û do qetî serbikewê."

 

Tecrîdo girankerde yê serê Rayberê PKKyî Abdullah Ocalanî de 22 serrî yo bêmabên dewam keno. Bi kampanyayê hemverê tecrîdî ameyî destpêkerdiş, Kurdistanî û dostê înan vejîyê meydanan û reaksîyonê xo ramojnenê. Tecrîdo ke sey sîstemêk taybet Îmraliyî de ame destpêkerdiş, ewro heme wareyê komelî de yeno kerdiş.

 

Dayîkê Aştîye û merdimê înan yê qezaya Ercîşî ya Wanî dîyar kerdî ke bi têkoşînê înan do tecrîdê serê Rayberê PKKyî Abdullah Ocalanî bi peynî bibo.

 

'Wa tecrîd peynî bibo'

 

Merdima tepişteyî, bi nameyê Hanim Dînçer, bale ant serê binpaykerdişê heqan ê zîndanan  hemverê tepişteyan û merdimê înan zêde benê û vat: "Tepişteyî semedê pawitişê cuya bi rûmet zîndanan de yê. Çewres serrî ma binê zulmê dewletan de şer kenê. Tutanê ma kişenê û îşkence kenê. Bi xêrê têkoşînê Kurdan ewro ma bîyayîşê xo musayî. Wa şarê Kurdî bêrê naskerdiş û aştîyêke bi rûmet bi ca bêro. Ma heqê xo yê weşî û perwerdeyê bi ziwanê xo wazenê. Ma wazenê tecrîdê serê Rayberê PKKyî Abdullah Ocalanî peynî bibo."

 

'Tecrîd tewr zêde ziwanê ma keno hedef' 

 

Guzel Çetîn vat, tecrîdê serê Rayberê PKKyî Abdullah Ocalanî êdî serê temamê komelî de yeno kerdiş û diyar kerd ke tewr zêde ziwanê kurdkî bi polîtîkayê asîmîlasyonî ameyo pelçiqnayîş.  Guzele wina ard ziwan: "Ez bi taybetî veng dana cinîyan û dayîkan; Rica kena! Keye de yan zî kuçeyan de bi tutanê xo dir bi ziwanê xo qisey bikerê. Ziwanê xo baş bikerê, meverdê vinî bibo."

 

'Zulmê serê şarê Kurdî bi peynî bibo' 

 

Dayîka Aştîye Hurîyet Keser dîyar kerd ke êdî nêwazenê gonî bêro rijnayîş û wina vat: "Zulmê serê Abdullah Ocalanî ganî vindarnê. Şima do heta key nê zulmî dewam bikerê? Bi serran o şarê Kurdî înkar kenê. Êdî bes o, şima do heta key tedayê xo dewam bikerê? Ma aştî wazenê. Ma wazenê bi însanî biciwîyê. Ma bi tutanê xo dir cuyêke wazenê."

 

'Ma do pîya tecrîd peynî bikerê'

 

Dayîka Aştîye Fehîme Guler, dîyar kerd ke hemverê zulmî lazimî bi yewbîyayîş esto û vat: "Her çend sereyê ma bedenê xo ra vejîyo û verê xo bido cayê cîya, ma pey ziwan, nasname, kultur û dewaya xo yê. Çi beno wa bibo, ma do serbikewê û ma do bi yewbîyayîş û têkoşînê xo ma do peynîya tecrîdî bîyarê."