ŞIRNEX - TJA û Meclîsê Cinîyan ê HDPyî yê Şirnexî çarçewaya 25ê teşrîna peyêne de hîkayeyê cinîyê ke ameyê qetilkerdiş, wendî.

 

Tevgerê Cinîyan ê Azadan (TJA) û Meclîsê Cinîyan ê  Partiya Demokratîke ya Şaran (HDP) ya Şirnexî, çarçewaya 25ê Teşrîna Peyêne Roja Têkoşînê Hemverê Şîdetê Serê Cinîyan ê Dinya de Dortyolê Cizîrê Şirnexî de hîkayeyê cinîyê ke ameyê qetilkerdiş wendî. Endamê Meclîsê Dayikê Aştiye, îdarekarê HDPyî yê merkez û qezayan û xeylêk cinî tewrê çalakî bî.

 

Sere de Hemsereka HDPyî ya Cizîrî Zilan Ecevît qiseykerdişêk kilm kerd. Zîlane wina vat: “Hemverê dîkdatoriya Trîjullo 3 wayê Mîrabell têkoşînêk dayî destpêkerdiş û no têkoşîn heta ewro dewam keno. Sey her serre emsar zî 25ê teşrîna peyêne hemverê sîstemê camêrdan de ma do wareyan de vengê xo berz bikerê.”

 

Cinîyan dima ra cinîyê ke ameyê qetilkerdiş hîkayeyê înan wend. Eşkerayî bi sloganê, “Cinî ciwîyayîş azadî” peynî bî.