AMED - Komîsyonê Heqê Tutan ê Amedî bi wesîleyê 20ê Teşrîna Peyêne roja “Heqê Tutan” ê mîyanneteweyî eşkerayîya çapemenî dayî. Eşkerayî de komisyonî bale ant serê ziwanê dayîke û ame dîyarkerdiş ke Tirkîya tewr zêde tutê kurdî ke bi ziwanê xo perwerde nêvînenê rastê binpaykerdişê heqan yenê.

 

Semedê pawitiş û başkerdişê şert û mercê cuya tutan hetê Heyetê Pêroyî yê Yewîya Neteweyî ra 20ê Teşrîna Peyêne “Roja Heqê Tutan” ame neqlkerdiş. Komîsyonê Pawitişê Heqê Tutan bi nê wesîleyî de Baroyê Amedî eşkerayîya çapemenî dayî. Eşkerayî hetê Serekê Komîsyonê Heqê Tutan Mehmet Emîn Gun ra ame wendiş.

 

'Rojêke de 32 tutî vînî benê' 

 

Mehmet Emîn sere de girîngiyê roje ard vîr û nameyê tutan ke Tirkîya de rastê binpaykerdişê heqan ameyê  rêzkerdiş. Mehmet Emîn vat, xeylêk tutî hetê polîs û leşkeran ra bi erebeyê zirxî ameyî qetilkerdiş, desteştic û tecawuz xeylêk kesan rê ameyo kerdiş û wina vat: "Coka hema heqê ê tutan nîno pawitiş û heme dewayan de tutî sucdar yenê hesibnayîş. Her çiqasî vîndîbîyayîşê tutan xeylêk nêkeweno rojeve zî goreyê cigêrayîşê ke ma kerdê Tirkîya de mîyanê rojêke de 32, mîyanê serrêke de zî 10.000 tutî vînî benê. 10 mengê destpêkê serra  2021 de 160 tutî rastê istismarê cinsî ameyê."

 

'Tutê kurdan yenê asîmîlasyonkerdiş'

 

Mehmetî bale ant serê tutê kurdan û vat: “Tutî verê her çî wayîrê heqê qiseykerdiş û perwerdeyê ziwanê dayîke yo. Coka bi milyonan tutî kurdî nê heqê xo ra mehrûm yenê verdayîş. No zî beno sebebê ke tutî problemê pîl yê psîkolojî û komelî biciwîyê. Tirkîya de çi heyf no eşkera yo ke tewr zêde tutî yenê asîmlekerdiş û rastê binpaykerdişê heqan yenê."