Hîkmet Tunç

 

WAN - Rêxistinê cinîyê hemverê şîdetê camêrdan û dewlete de, do Wan de vejîyê meydanan seba rayrayîşê 25ê teşrîna peyêne de bêro kerdiş, veng dayî pêro cinîyan ke beşdarê rayrayîşî bibê. Rêxistinê cinîyan ke bale antî serê girîngiyê têkoşînê cinîyan dîyar kerdî ke têkoşînê înan sînor derbaz kerdo. 

 

25ê Teşrîna Peyêne Roja Têkoşînê hemverê Şîdetê serê Cinîyan tay mend. Bi polîtîkayê zîhniyetê îqtîdar ê camêrdan Vakur û Tirkîya de hema hema her roje cinîyêke yena qetilkerdiş. Nê bajaran ra yew zî Wan o  û tîya de cinî semedê 25ê teşrîna peyêne amadekariyê xo dewam kenê. Do cinî Wan ra bi rayrayîşê ke 25ê teşrîna peyêne de bêro kerdiş, Parqê Mûsa Anter heta yê Feqiyê Teyran vengê xo berz bikerê.

 

Temsîlkarê rêxistinê cinîyan ê bajarî derheqê 25ê teşrîna peyêne de ercnayîş kerdî.

 

‘Semedo ke ma hemverê şîdetî tewr bi hêz bê ma çalakîyan bikerê’ 

 

Endama Meclîsê Platformê Şubeyê Wanî ya Sendîkayê Kedkarê Temsîlkarî (KESK) Funda Demir Bozkurt bale ant serê amadekariyê xo yê seba 25'ê teşrîna peyêne û wina vat: “Ma xebatê xo dewam kenê. Do panel, hîkayeyê kitaban, atolyeyê viraştişê bronşan bêrê kerdiş. Ma verê zî nê çalakîyan kerdibî.  Semedo ke ma bale bi ancê serê şîdetê cinî, ma hewl danê ke bi hêz têbigeyrê. Ma tewr zêde serê kitaban de bale ancenê serê babeta hişmendîyê azadîya cinîyan. Sewbîna ma do çalakiyê xo de bale biancê serê girîngîyê Pêkerdişê Stenbolî. Ma veng danê heme cinîyan ke beşdarê çalakîyê ma bibê."

 

‘Ma amadekarîyê vejîyayîşê teberî kenê’

 

Sekreteryayê Platformê Cinîyan ê Wanî ra Asya Kaçar zî vat, çarçewaya 25ê teşrîna peyêne de do xeylêk sazgehî vejîyê meydana û wina vat: “Semedo ke ma tewr zêde bale bi ancê serê şîdetê cinsî, ekonomî, psîkolojîk, fîzîkî ma bixebityê. Ma do serê çareserîyê nê probleman de vinderê. Na çarçewa de  22yê teşrîna peyêne de panelê ma bêro organîzekerdiş. Do 25'ê teşrîna peyêne de zî rayrayîş bêro kerdiş. Ma amadekarîyê vejîyayîşê teberî kenê. Hemverê qirkerdişê serê cinîyan ganî ma vengê xo berz bikerê.”

 

‘Têkoşînê cinîyan sînor derbaz kerd’

 

Aktivîsta Tevgerê Cinîyan ê Azadan (TJA) Gulcan Kaçmaz Sagyigit têkoşînê wayê Mîrabel ard vîr û vat: “A roje de cinîyan sînorê têkoşînê xo derbaz kerdê. Ganî ma heme rojan sey roja 25ê teşrîna peyêne pêşwazî bikerê. Semedo ke Musa Orhan bi sebebê merdişê Îpek Er nîno tepiştiş. Herême de fuhuş û tîryakî yenê ferzkerdiş. Ayşe Gokkan semedê têkoşînê cinîyan kerd 30 serrî ceza ci rê dayî. Coka ma 25ê Teşrîna peyêne de wareyan veng nêverdê.”

 

‘Ma sey komele têkoşînê xo yê hemverê şîdetî dewam kenê’ 

 

Endama Komeleya Cinîyan ê Starî Serap Guvenç zî wina vat: "Şîdet problemêkê komelî yo. Zirar dano pêro manewî. Ma sey komele têkoşînê xo yê hemverê şîdetî dewam kenê. Ma do broşê ke ma serê şîdetê hemverê tut û cinîyan amade kerdo de vila bikerê. Ma do serdayîşê kesê ke muracat kerdê bikerê. Ma do serê babetê tîryakî û fuhuşî Colemêrg de bi cinîyan dir bêrê têhet.”