Medya Uren-Derya Ren 

 

AMED - Dayîkê Amedî derheqê çalakîya dayîkê Sêmalkayî de paştdayîşê xo dîyar kerdî û wina vatî: "Çîyo ke dayîkan rê yeno kerdiş, heqaret û zulm o. Zerrîya ma waştêne ke ma paştdayîş bidê çalakîya dayîkê Şehîdan. La çi heyf sînorî ma rê benê asteng. Ma hêvî kenê yê ke benê sebebê nê zulmî serkewtiş nêvînê."

 

Cenazeyê HPGyîjî ke dafika Partîya Demokratîke ya Kurdistanî (PDK) de dinyaya xo bedilnayî, teslîmê keyeyê înan nînê kerdiş. Keye semedê cenazeyê xo bigîro verê berê Sînorê Sêmalkayî de mabêne Herêma Federe ya Kurdistanî û Vakur û Rojhelatê Sûrîye de çadirî dayî ro û çalakîya xo dewam kenê. Dayîkên Amedî semedê çalakîya dayîkê Sêmalkayî qisey kerdî û paştdayîşê xo semedê înan ardî ziwan.

 

'Ma arayî bi şima zî şamî yê' 

 

Îdarekarîya Komeleya  Paştdayîşê Keyeyê Tepişteyan (TUAY-DER) Muşer Ulker têkoşerê dewa ard vîr û wina vat: "No demêke yo tutê ma cepheyê şerî de mîyanê dafike de xo ver danê. Ma nêzdîbîyayîşê Barzanî şermezar kenê. Ma nameyê tutanê xo kerdêne Barzanî, ma vatêne o zî ma ra yo. Ey qedir û qîmetê xo yê verê ma qedêna. Beno şîrîkê qetlîaman û destê xo keno mîyanê gonîya wayê û birayê xo. Lazim o PDK êdî bêro serê rayîrê rastî û fek şerê birakiştişî ra vera bido. Do tarîx de no sey şermêk pîl bêro vîrardiş. Ti bî şirîkê qetilkerdişê nê şerwanan û ti cenazeyê înan zî nêdanê. Eke ê koyê Kurdistanî bêrê îşxalkerdiş, sebebê ci PDK yo û ma înan efû nêkenê. Eke ma arayî bê ê zî arayî yê, wa nê nêkerê xo vîr ra."

 

'Wayîrê cenazeyan vejîyê' 

 

Muşere bale ant serê kerdişan û vat: "Ez heme kurdê ke wayîrê ê cenazeyan vejênê zerrî û gan ra silam kena. Ê canezeyî rûmetê ma û erjê ma yê. Ez veng dana kurdê bi şeref ke wayîrê ê cenazeyan û çalakîya dayîkan vejîyê. Yê ke hemverê zulmî vejîyê sey şîyê tewafê hecî. Ma deyndarê nê şerwananê xo yê û ma mecbûr ê wayîrê înan vejîyê."

 

'Ma nêzdîbîyayîşê PDKyî şermezar kenê' 

 

Hatîce Oner zî bi nê vatişan paştdayîş da çalakîya dayîkê Sêmalkayî û wina vat: "Eke Barzanî vano ez îdarekarêk û rayberêk ê kurdan a lazim o a gore ra nêzdî bibo. Ganî goreyê berjewendîyê kesî ney goreyê berjewendiyê heme kurdan bifikirîyo û têbigeyro. Şervanê ke semedê herra xo ganê xo feda kenê bi hawayêke wehşî ameyî qetilkerdiş û cenazeyê înan zî nêdanê ma. Ma dayîkî tewr tay wazenê ke mezelêke tutanê înan bibo. Do sebra xo bi welîye înan bîyarê. Labelê rexmê ke bi rojano çalakîya dayîkan serê fekê sînorî de dewam kena zî cenazeyê înan nînê dayîş. Eke gonîya ey xirab nêbo do nêeşko nê çîyan bikero. Zerrîya ma heme dayîkan dejena. Eke ewro ê dayîkî semedê tutanê xo binalê, siba dora ma ya. Lazim o heme kurdê wayîrê şerefî wayîrê çalakîya dayîkan vejîyê."

 

'Destê ma yewbînan ra visnayê' 

 

Zerîfe Guneş zî tewr peyîn wina vat: "Cenazeyê ê şerwanan erjê ma yê. Ma do wayîrê erjê xo vejîyê û heme dayîkê ke verê berê sînorê Sêmalkayî de nobete de yê ma înan silam kenê. Heyf û se rey heyf ke rayberê kurdan bi nameyê îxanet û nê zulmî bêrê vîrardiş. Ma nêzdîbîyayîşê înan şermezar kenê. Nê îxanet û zulmê şerê birakiştişî semedê çi keno? Ma seba nê aciz û bi reaksîyon ê. Çalakîya dayikan ya hemverê nê îxanetî û wayîrvejîyayîşê erjê xo çalakîya rûmetî ya. Ma sey dayikê Amedî paştdayîş danê çalakîya înan û ma omid kenê ke PDK zî lezabez şaşîyanê xo ra agêro. Eke astengîyê sînoran mabêne ma de nêbîne, ma do xo biresnayîne înan û kîşte înan de ca bigirewtêne. Destê ma yewbînan ra visnayê û xora no zulmo tewr pîl o."