STENBOL - Cinîyê ke dîyar kerdî ke pêwa tecrîdê şerî û şîdet zêde beno de vatî, "Cinî ewro bi xêrê Serekî têkoşînê azadî kenê û ganî cinî çar parçeyê Kurdistanî de têkoşînê xo dewam bikerê."

 

Pêwa tecrîdo ke 22 serrî yo Zîndanê Tîpê F yê Îmraliyî de serê Rayberê PKKyî Abdullah Ocalanî de dewam keno, 8 mengî yo bi tu hawayî xebere ci ra nîna girewtiş. Tecrîdo ke Îmraliyî de ame destpêkerdiş serê temamê komelî de tesîr keno, zîndanan ra vilayê kuçeyan beno. Bi polîtîkayê ke yenê kerdiş zî tewr zêde tesîr serê cinîyan de keno. Tecrîdê serê cinîyan de yeno kerdiş bi şîdet, destbendkerdiş, tepiştiş, qirkerdiş, tecawuz, ferzkerdişê fuhûşî cinîyan de xo dano teber.

 

Cinîyê ke hemverê tecrîdê Îmraliyî reaksîyon ramojnayî vatî, "Heta ke ma sax bê, ma cinî serê lingan û meydanan de bê."

 

'Wa tecrîd serê cinî û Serekî ra bêro peynîkerdiş'  

 

Hemsereka Partîya Demokratîke ya Şaran (HDP) ya Kuçukçekmeceyê Stenbolî Gulsum Ozturk ke vat, wa cinî vejîyê wareyan û sere wedarnê dewamê qiseykerdişê xo de wina vat, "Êdî bes o wa tecrîdê serê cinî û Serekî bêro peynîkerdiş. Ciwanî û tutê ma zîndan de yê. Ma nêwazenê ke cinî bêrê qetilkerdiş û zîndan de bimanê. Ma semedo ke cinîyan bipawê wareyan de yê."

 

'Tepişteyan serbest vera bidê' 

 

Gulsume dîyar kerd ke şer û kiştiş nêwazenê û reaksîyon vera  helwestê PDKyî yê hemverê hêrişê dewleta tirkî yê serê Herêma Fedaral a Kurdistanî da û wina vat: "Merdim bi merdiman danê kiştiş la peynîya kiştişî zî nîna. Ma bi kiştiş nêqedênê. Eke ewro ez bêrî kiştiş xeylêk cinî estê ke cuye dewam bikerê." Gulsimê vengdayîşê têkoşînê hemverê cinîyan kerd û waştişê veradayîşê tepişteyan zî kerd.

 

'Cinî têkoşîn kenê' 

 

Dayîka Aştîye Medîne Bektaş zî vat ke cinîyan rê zulm yeno kerdiş û qirkerdişê cinîyan zêde beno. Medîne dîyar kerd ke waştişê înan yê sereyîn azadî yo û vat: "Tewr zêde cinî û ciwanî yenê kiştiş. Ma nêwazenê ke cinî zulm bivînê, bêrê kiştiş,tepiştiş, tecawuzkerdiş û bikewê zîndan. Ma wazenê cinî serbikewê. Cinî ciwîyayîş a. Ma aştî û azadî wazenê. Heta peynî ma do têkoşînê xo dewam bikerê."

 

'Cinî xêrê serekî semedê azadîya xo têkoşîn kenê'

 

Dayîka Aştîye Behîye Duman zî bale ant tecrîdê Îmraliyî û vat: "Cinî ewro xêrê Serekî semedê azadîya xo têkoşîn kenê.  Heme cinîyê dinya paştdayîş danê cinîyê ke semedê azadî têkoşîn kenê. Ma tecrîdê serê Serekî şermezar kenê. Tecrîd tena serê Serekî de ney, serê temamê Kurdistanî de yeno kerdiş."

 

'Semedê azadîya cinî wa her kes bêro têhet' 

 

Behîye tewr peyîn qiseykerdişê xo wina qedêna: "Wazenê cinî keye de bimano û nêzan bo. Wa cinî destê xo bidê yewbînan. Heme kesî semedê azadîya cinî têkoşîn kenê wa bêrê têhet. Wexto ke ma bêrê têhet, do pêkerdişê semedê cinîyan zî bêrê caardiş."