Medya Uren

 

AMED - Hemsereka Komeleya Edebîyatkaranê Kurdî Sultan Yaray û îdarekara komeleyî Nurcan Delîl derheqê têhetameyîşê nuştoxan ser o qisey kerdî. Sultane û Nûrcane bale antî serê girîngîyê yewbîyayîşê şarê kurdî û rêxistinbîyayîşî û wina vatî: "Sey komele amancê ma rêxistinkerdişê nuştoxan o. No lazimîyê ma yo û ma bawer ê do bi yewbîyayîş û rêxistinbîyayîşî dir yewbîyayîşê kurdan zî bibo. Ma eşkenê bi qelama xo zî bibê wesîleyê nê çî."

 

Komeleya Edebîyatkaranê Kurdî bi amancê rêxistinkerdişî, yewbîyayîşê nuştoxan û yewbîyayîşê şarê kurdî vizêr arayî de xeylêk nuştoxan dir ameyî têhet. Hemsereka komeleyî Sultan Yaray û îdarekara komeleyî Nurcan Delîl derheqê amancê bername û netîceyê ke girewtê ajansê ma rê qisey kerdî.

 

'7 kesan ra ma bî 30 kesî'

 

Sultane bale ant serê amancê  bernameyî û vat semedo ke xo bi rêxistin bikerê û vernîya vilabîyayîşî bigîrê lazimî bi nê bernameyan esto. Sultane wina vat: "Ma vernîya serrêke komeleya xo ya Edebîyatkaranê Kurdî akerd. Ma bi  7 kesan dest pêkerd û nika zî hûmara ma resaya 30 kesan. No semedê ma hûmarêke pîl a û ma do xo tewr aver berê. Nika zî amancê ma yo sereyîn rêxistinkerdişê nuştoxan o. Ma do yewbînan nas bikerê û ma do pê dir bieşkê fikrê xo pare bikerê. Xeylêk rey nuştoxê kurdî yê ke kedêke pîl danê tena bi  weşanxaneyê ke ci dir xebityenê kewenê têkilî. Ma wazenê ke têkilîyê heme nuştoxan yewbînan dir virazyo."

 

'Problemê kurdan ê pîl yewbîyayîş o' 

 

Sultane wina vat: "Ma zanê nuştoxî eşkenê bi qelema xo tesîr serê fikr û fehmê komelî de bikerê. Eşkenê verê komelî fetilnê cayêk bîn zî. Lazim o ma hêzê xo bikerê yew. Lazim o ma heme destê xo bikerê binê kerra. Semedo ke problemê ma yo yewin yewbîyayîş o. Ma zanê bi yewbîyayîşî dir azadî zî bêro. .lazim o ma bi tesîr têbigeyrê."

 

'Ma xo bi rêxistin kenê' 

 

Nûrcanê zî dîyar kerd ke ê seke komela demêk derg o wazenê pîya kombîyayîşan viraznê û vat: "Ma waşt ke ma bêrê têhet û yewbînan nas bikerê. Bernameyê ma zî bi serkewte derbaz bî. Ez bawer a ke do rojê bêrê de zî bibo gamêk pîl. Amancê ma dayîş û girewtişî de fikrê yewbînan ê. Ma bi parekerdişî dir tewr dewlemend benê. Bê guman bi nê rengî zî ma xo bi rêxistin kenê û ma yewbîyayîşêk nuştoxê kurdî awan kenê."

 

'Lazim o ma goş bidê problemê komelî' 

 

Nûrcane tewr peyîn veng da û vat: "Ma vanê nuştoxî tewr zêde xîtabê komelî kenê. Hunerê xo semedê komelî munenê. Ma eşkenê vajê zî eke yewbîyayîş û rêxistinbîyayîşêk nê nuştoxan çinî bo, nêeşkenê tesîrêk pîl serê ê komelî de bikerê.  Encax bi rêxistinbîyayîşî do bieşkê rayîrêk rast bidê verê komelî. Eke ma xizmet komel û ziwanê xo rê kenê lazim o ma heme berjewendîyê komelî zî bigîrê dest. Goş bidê problem û lazimîyê komelî. Goreyê nê zî ganî ma hetê edebîyatî de raybertîyê xurt û rêxistinkerde bikerê."