STENBOL - Cinîyan dîyar kerdî ke tecrîdê serê Rayberê PKKyî Abdullah Ocalanî bi têkoşîn eşkeno bêro şikinayîş û vatî, dem demê azadîya Rayberîya înan a.

 

Tecrîdê serê Rayberê PKKyî Abdullah Ocalanî ke Girawa Îmraliyî de tepişte yo, her ke şino giran beno û 7 mengî yo agahî ci ra nîna girewtiş. Semedê na rewşe, endîşeyî zî zêde benê. Hewldayîşê keye û avûkatan yê semedê pêvînayîşî zî hetê selahîyetdaran ra bê cewab yenê verdayîş.

 

Cinîyan reaksîyon vera tecrîdê giran dayî û waştişê azadîya fîzîkî ya Abdullah Ocalanî kerdî.

 

'Ma Rayberî biresnê azadîya ey'

 

Cinîya bi nameyê Muhsîne Saçan silam Abdullah Ocalanî rê şawit û vat: "Ey vengê ma pêro dinya rê da eşnawitiş. Ez veng dana pêro dayîkanê kurdan, bêrê ma dest bidê yewbînan, tecrîd qebul nêkerê û Rayberî azad bikerê. Tecrîd tena serê Rayberê ma de nîyo, serê ma hemîne de yo. Wexto ke rayber azad bibo do heme dayîkî, tepişteyî û Kurdistan azad bibo. Eke ma bibê yew do vera ma aciz bibê. Azadîya Rayberî bi têkoşînê hempar mimkun o."

 

'Bi têkoşînêk pîl tecrîd do bêro şikinayîş'

 

Nesrîn Arîn zî vat ke tecrîd sey hesire dayîkan rê agêreno û vat: "Ganî her kes pîya têbigeyro. Feydeyê tu kesî şarê kurdî rê çin o.  Ancax bi yewîye eşkeno xelas bibo. Ma zulmêk pîl ciwîyenê. Hemverê ziwanê ma hêrişêk pîl esto. Tehemulê înan hemverê tabelayê Kurdkî zî çin o. Pî û kalê ma semedê çi gonî rijnayî? Ma azadî, yewîye wazenê. Ma zulm nêwazenê. Rayberê ma nê rayîrê azadî da verê ma û cinîyan azad kerd. Ewro ganî bi hezaran cinî kuçeyan de hemverê tecrîdî veng vejê."

 

'Azadîya Rayberî azadîya şarê Kurdî ya' 

 

Zerîfe Subaşi zî dîyar kerd ke eke Abdullah Ocalan azad bibo do şarê  kurdî zî azad bibê û vat: "Ma azadîya serekê xo wazenê. Ma wazenê tecrîdê serê şarê kurdî bişikîyo. Ma azadî, ziwan, heqê perwerdeyî wazenê. Ma nêwazenê  ma bêrê qetilkerdiş û kiştiş. Serê dayîkan de tedayêk pîl esto. Zîndanan de tedayî estê. Tecrîdo ke yeno kerdiş zag giran o. Ganî ma bibê vengê înan. Çekê kîmyewî bi serê şarê ma de rijnenê. Ma fek têkoşînê xo ra vera nêdanê."