ÊLIH - Dayîkê Aştîye dîyar kerdî lazimîyê nê welatî bi aştî û demokrasî esto û vat: "Semedê polîtîkayê tecrîdî Tirkîya de xetimnayîşêk virazyayo. Lazim o ke safîkerdişêk bêro kerdiş û şar nê tecrîdî ra bêro xelisnayîş."

 

Bi 22 serrî yo zîndanê girawa Îmralîyî de serê Rayberê PKKyî Abdullah Ocalanî de tecrîdêk girankerde yeno kerdiş. Sewbîna 7 mengî yo Abdullah Ocalanî ra agahî nîna girewtiş û muracatê keye û avûkatanê ey zî nînê cewabkerdiş.  Semedê nê vengdayîşê seba wedaritişê tecrîdî her ke şino xo tewr zêde keno. Endamê Meclîsê Dayîkê Aştîye yê Êlîhî vengdayîş semedê wedaritişê tecrîdî kerdî.

 

'Semedê tecrîdî Tirkîya de xetimnayîşêk virazyayo'

 

Meryem Turay dîyar kerd ke heta ke tecrîd nêwurzo do problemê nê welatî safî nêbê û vat: "Ma wazenê no tecrîd serê birêz Ocalanî û serê şaran ra wurzo. Heta tecrîd nêwurzo şar nêeşkeno nefes bigîro. Êdî her het ra xetimnayîşêk virazyayo. Xora tecrîdê serê tepişteyan her ke şino pîl beno. Bi seyan tepişteyê ma zîndanan de binê tecrîdêk giran de yê. Wa aştî û cuyêka bi hizûr virazyo. Ma dayîkî êdî nêwazenê gonî biirijîyo. Semedê nê zî ganî ewilî tecrîd bêro wedaritiş. Veng dana ke wa êdî dewleta tirkî nê tecrîdî wedarno û semedê heme şaran aştîyêk bibo."

 

'Seba polîtîkayê tecrîdî fikr û fehmê şarî yeno astengkerdiş'

 

Taybet Tekîn zî dîyar kerd ke tecrîd tewr zêde şarê kurdî ciwîyenê û wina vat: "Tecrîd serê ma hemine de yo. La tecrîdo tewr giran kurdî ciwîyenê. Her het ra şarê kurdî rastê teda yenê. Bi polîtîkayê tecrîd de nêeşkenê bi hawayêke azad fikrê xo vajê. Sewbîna tecrîd sey metodêk serê zîndanan de yeno kerdiş. Lajê mi bi 6 serrî yo zîndanan de yo û behsê zulm û tedayê ke serê înan de yenê kerdiş keno. Ma eşkenê vajê ke êdî zîndanî bîyê sey îşkencexane. Tehde û îşkenceyê ke serê tepişteyan de yenê kerdiş zulmêk zaf pîl o. Xora tepişteyî destê înan de sey esîr ê. Sey verê nîyo, nika tu heqê tepişteyan nêmendo. Gerek semedê nê ma paştdayîş bidê tepişteyan û tepişteyanê xo tena nêverdê. Xora ne qanûn ne edalet ne zî wijdanê înan mendo. Tena karê zulm û zordestî zanê."

 

'Dayîkî bi serran o zerrîveşaye yê' 

 

Şukrîye Acar zî wina vat: “Ma nê tecrîdê serê şarî, cinîyan, ciwanan, tepişteyan nêwazenê û qebûl nêkenê. Waştişê ma yê yewser aştî, têduştî û hizûrî yo. Ma hemverê cuyêka bindest ê. Semedê ma hemine cuyêka têduşt û demokratîk lazim o. Hende seba wedaritişê tecrîdî xebaî yenê kerdiş ganî tecrîd serê ma hemine ra bêro wedaritiş. Ma dayîkî bi serran o zerrîveşayeyê. Bes êdî nê zulm û bindestî rê. Ma wazenê wa êdî rîyê dayîkan bihuyo. Lazimîyê înan bi aştî dir esto."

 

'Semedê qedênayîşê tecrîdî ganî tecrîd bêro wedaritiş' 

 

Tewr peyîn Menîcê Goktay qisey kerd û vat: “Semedê rewşa tepişteyan hewn nêkeweno çimanê ma. Ma bi şewe û roj seba tepişteyanê xo bermenê. Hizûr bi şikinayîşê tecrîdê serê birêz Ocalanî mimkun o. Her ca de şer û pêrodayîş esto û seba ke êdî no zulm û şer peynî bibo ganî no tecrîd bêro şikinayîşî. Lazim o ke safîkerdişêk bêro kerdiş û şar binê nê tecrîdî ra bêro xelaskerdiş."