Derya Ren

 

AMED - Hemsereka MED-DERî Şîlan Elmas Kan dîyar kerd ke ê do her qezaya Amedî de temsîlkarîyê  MED-DERî abikerê û wina vat: "Semedo ke ma kurdkî bidê ciwîyayîş û qiseykerdiş ma do heme îmkanê xo seferber bikerê. Ma do têkoşînê xo yê semedê pawitişê ziwanî dewam bikerê."

 

Goreyê cigêrayîşê ke tarîxnasan  kerdê, dinya de 7 hezarî ziwanî estê. Yeno vatiş ke xeylêk ziwanî çinbîyayîşî dir ameyê rî bi rî û ziwano tewr emro derg ê dinya zî Çînî yo. Roja ewro de ziwanêko kewto tehluke Kurdkî yo.

 

Bajarê Tirkîya û herême bi amancê ciwîyayîşê ziwanê Kurdkî sazgeh û dezgehî amebî akerdiş 6 serrê peyîn de hetê hukmatî ra ameyî padayîş. Nînan ra yew zî Komeleya Averşîyayîş û Cigêrayîşê Ziwanê Kurdkî (KURDÎ-DER) 21ê teşrîna peyêne 2016 de bi KHKyî dir ameyî padayîş û vera ci Komeleya Cigêrayîşê Kultur û Ziwan yê Mezopotamyayî (MED-DER) 2017 de ame akerdiş.

 

MED-DERî ke wareyê ziwanî de xebatan keno, xeylêk merkez û qezayê Amedî temsîlkarî akerd. Hemsereka MED-DERî Şîlan Elmas Kan derheqê babete de qisey kerd û vat, 4ê teşrîna peyêne de Farqîn de temsîlkarî akerdê û demê bêro de zî hedefê înan oyo ke heme qezeyanê bînî yê Amedî temsîlkarîyê MED-DERî abikerê.

 

'Tirkîya de demokrasî bi ca nîno'

 

Şîlane vat, dimayê ke KURDÎ-DER ameyo padayîş 2017 de Amed de MED-DER akerdê û vat: "Ganî xebatê ma qezayê merkezî bi sînor nêmanê. Semedê nê qezayan de şube akerdî. Şubeyo yewin ma Farqîn de akerd, semedo ke Farqîn semedê ma qezayêke girîng o. Se ra 99 şar Kurdkî qisey keno. Nê xebatê ma heta ke ziwanê Kurdkî bibo ziwanê fermî do dewam bikerê. Polîtîkayê çinkerdişê Kurdkî polîtîkayê ewro nîyo. Dewlete her tim polîtîkayê çinkerdiş kerd. Roja ke Komara Tirkîya ameya awankerdiş heta nika hemverê ziwan, dîn, kultur û şaran o. Tirkîya de demokrasî nîna kerdiş. Tena Tirkî Tirkîya de nêciwîyenê. Xeylêk şarê neteweyê cîya zî ciwîyenê."

 

'Tehemulê înan semedê Kurdkî êin o'

 

Şîlane wina dewam kerd: "Hukmat bîyayîşê xo serê ziwanêk de keno. Vera komeleyan ganî ma wendegehê Kurdkî abikero. La dewlete heqê ma yê perwerde asteng keno. Ma sey MED-DERî demê Farqînî komele akerd, polîsan astengî vet. Vatî bi 15 kesî dir komeleye abikerê. Nêverdayî ma govende bikerê, deyîranê Kurdkî vajê. Farqîn de Mudûrîyê Emniyetî esto la selahîyetdaran Amed ra polîsî ardibî. No zî mojneno ke tehemulê înan hemverê Kurdkî çin o. Wina kenê ke şarî bitersnê. La heqê dewlete çin o ke heqê ma  desteser bikero.”

 

'Semedê ziwan do têkoşînê ma dewam bikero'

 

Şîlane tewr peyîn wina vat: "Dewlete hemverê Kurdkî polîtîkayê cîya kena. Çîyo ke nika beno netîceyê polîtîkayê dewlete yê dûrî yo. Ma serrê herra xo nêeşkenê bi ziwanê xo perwerde bivînê, nêverdenê tutê ma ziwanê xo aver berê. Hukmat semedê çinkerdişê ziwanî polîtîka keno. Ma sey MED-DERî semedê ciwîyayîşê Kurdkî û qiseykerdişê Kurdkî ma do pêro îmkananê xo  seferber bikerê. Têkoşînê ma yê semedê ziwanî dewam keno."