AMED - Zîndanê Ereglî yê Konya de binê pêvînayîşê avûkatan de tepişteyê ke qawişê înan ra yenê vetiş, mecbûr yenê verdayîş bi dozgerî û polîsê tevgerê taybet dir pêvînayîş bikerê û hemverê tepişteyan cipersayîşo xidar ame kerdiş.

 

Binpaykerdişê heqan ê hemverê tepişteyan her ke şino zêde beno. Ame zanayîş ke Omer Sipek ke Zîndanê Eregliyê Konyayî de yeno tepiştiş, pêwa embazanê xo yê qawişî bi vatişê, "avûkat ame” qawişê xo ra yenê vetiş û mecbûr yenê verdayîş bi dozger û polîsê tevgerê taybet û avûkatanê verê nêdîyê dir pêvînayîş bikerê. Sewbîna hemverê tepişteyan cipersayîşê xidar ame kerdiş.

 

Omer bi rayîrê pêvînayîşê bi telefonî dir dayîka xo Saadet Siper dir binpaykerdişê heqan zîndanan neql kerd.

 

‘Şima talîmat kamî ra gênê?’

 

Saadete dîyar kerd ke Zîndanê Eregliyî de polîtîkayêk cîya yeno kerdiş û wina vat: "Lajê mi wexto ke vizêr mi gêra, dîyar kerd ke zîndanan de teda zêde bîyê. Omerî mi ra vat, 'Dayê rojê vîyarte de vatî, avûkatê to ameyo û mi qawiş ra vetî. Mi berdî odeyêke. Wexto ke ez hêvîya avûkatî bîya mi dî ke dozgerî û polîsê tevgerê taybet û avûkatê verê mi nêdayê vejîyayî vernîya mi. Cipersayîşêk xidar hemverê mi bi ca ardî. Vatî şima çira dest bi grevê vêşanîye kerdê û şima talîmat kamî ra gênê? Wexto ke mi nêwaşt ez cewab bidî, mi tehdîd kerdî.’ Çira nê çîyan bi tutanê ma danê ciwîyayîş?”

 

Saadete dîyar kerd ke tedayê zîndanan her ke şino  zêde beno labelê zîndanê Konya de nê tedayî hîn zêde yê û vat, sere de keyeyê tepişteyan û her kes ganî bi hîs têbigeyro.