Medya Uren

 

MÊRDÎN - Tepişteyo Sîyasî Abdullah Gunay ke Zîndanê  Kiriklar ê Îzmîrî de yeno tepiştiş, pêvînayîşê rayîrê bi telefonî de keyeyê xo rê binpaykerdişê heqan ê zîndanî yenê kerdiş neql kerd û vengdayîşê wayîrvejîyayîşê zîndanan kerd.

 

Demê peyîn de binpaykerdişê heqan û tecrîdê serê tepişteyê sîyasî yeno kerdiş bi serebûtê newe de rojeve de yê. Tepişteyo sîyasî Abdullah Gunay ke Zîndanê Kiriklarê Îzmîrî de maneno bi rayîrê telefonî neql kerd ke 2 embazê înan bi zor qawişe ameyê remnayîş û semedo ke şîdet serê înan de yeno kerdiş, dest bi çalakîya vengvetişî kerdê. Serê çalakîya ke bi rojano dewam kena zî Komeleya Heqê Merdiman (ÎHD)  serdayîşê zîndanî kerd.

 

Serdayîşî de tepişteyan binpaykerdişê ke benê qal kerdê û waştişê akerdişê dewa kerdê. Avûkatê ÎHDyî do Mudurê Zîndanê Kiriklarî Ali Haydar Ak rê dewa akerê. Tepişteyan qiseykerdişê xo de zî vatibi ke seba ke yewbînan ra dûr bifînê her metod xebitnenê û serê înan de şîdetê psîkolojîk yeno kerdiş. Avûkatan eynî wextî de zî  dîyar kerdî ke semedê çalakîya hemverê binpaykerdişê heqan ameyê kerdiş zî wazenê cezaya disiplînî tepişteyan rê bibirnê.

 

'Çîyo ke tepişteyan rê yeno kerdiş zulm o, ma vera nê zulmî bêveng nêmanê'

 

Dayîka tepişteyê sîyasî Abdullah Gunay, Besna Gunay derheqê binpaykerdişan de wina vat: "Binê nameyê qanûnan de metodê kêyfî li serê tutanê ma de kenê. Destûrê boydayîşî ke mîyanê roje de ameyîne dayîş zî binê nameyê qanûnan de ame wedaritiş. Bi bahaneyê şube tewr zêde tecrîd serê înan de kenê. Xeylêk embazê înan verê înan ra ameyê remnayîş. Bi seyan serebûtê winasî qewimyenê. Çîyo ke înan rê yeno kerdiş zulm o. Ê do helbet vera nê helwestê xo ramojnê. Coka ê vera nê zî vejênê. Lazim o ma bêveng nêmanê. Wazenê înfazê tutanê ma betal bikerê. Wazenê serê zulmê ke kenê de tewr girs bikerê. Çîyo ke tepişteyan rê yeno kerdiş zulm o, ma vera nê zulmî bêveng nêmanê."

 

'Şima çi dewa tutanê ma rê kenê?'

 

Besna dewam de wina vat: "Muduro ke ameyo tayînkerdiş, şîdetê psîkolojîk serê înan de keno. No çîyo serê ma de kenê. Ma bes nîyo! Tena tutanê ma ney, keyeyê înan zî kenê mîyanê tecrîd. Ê bi milyonan merdiman kesî kenê binê nê zulmî. Na rewşe ameya wina sewîyeyêke cezaya înan qedêna zî vera nêdanê. Tepişteyê nêweşî, tepişteyê ke emrê înan pîl o zî pêwa raporê nêeşkenê zîndan de bimanê zî nînê veradayîş. Semedê nê sebebê înan zêde yo."

 

'Wa xo êdî ker û lal nêkerê' 

 

Besna tewr peyîn veng da dayîkan û vat: "Ma vernîya nika bi çalakîyanê xo paştdayîş da zîndan. Ma înan rê bî veng û moral. Lazim o ma  çalakîyanê xo nika zî dewam bikerê. Ma nêbê veng do erey bo. Ma nê zulmî zulmî qebûl nêkenê. Ez veng dana dayîkan, komeleyê heqê merdiman, yê ke Ewropa de yê, wa êdî xo ker û lal nêkerê. Ma pîya wurzê êdî."