Rojda Aydin

 

ŞIRNEX - Endamê Meclîsê Dayîkê Aştîye yê Şirnexî, dîyar kerdî ke bi girankerdişê tecrîdî dir şer kûr bîyo û vatî: "Koyan de bi çekê kimyewî tutanê ma kişenê û bajar zî bi tîryakî, fihûş û ajanî dir tutanê ma kişenê. No tecrîd heta nêro wedaritiş û Ocalan azad nêbo do dewam bikero. Semedê nê zî ganî kesê bi wijdanî bibê yew û sere wedaritine."

 

Tecrîdo girankerde yê serê Rayberê PKKyî Abdulah Ocalan û tepişteyê bînî Omer Hayrî Konar, Veysî Aktaş û Hamîlî Yildirim yê Zîndanê Asayîşê Berz ê Tîpê F yê Îmraliyî de yenê tepiştiş, dewam keno. Avûkatê Buroyê Huqûqê yê Asrinî û keyeyî her hewte muracatê Mudurîyetê Zîndanê Îmraliyî hem zî Serdozgerîya Komare ya Bûrsayî kenê. Ne pozîtîf ne zî negatîf cewab nîno dayîş.

 

Avûkatê Ocalanî dimayê 8 serran 2-22yê gulane, 12-18ê hezîrane û 7ê tebaxa 2019 de eşkabî pêvînayîş bi muwekîlê xo dir bikerê. Abdullah Ocalan, reya ewil 27ê nîsana 2020 de bi telefon bi birayê xo Mehmet Ocalanî dir qisey kerdibi. Qiseykerdişê bi telefonî yê diyîn û yê peynî ke Ocalan, 25ê adara emsar de bi birayê xo Mehmet Ocalan dir kerdibi, nîme de amebi birnayîş.

 

Derheqê tecrîd û netîceyê tecrîdî yê  serê komelî de endamê Meclîsê Dayîkê Aştîye yê Şirnexî Kiymet Acar û Geyisa Dayan ajansê ma dir qisey kerdî.

 

'Îqtîdar fikr û fehmê ci ra terseno'

 

Kiymet Acar, destpêkê qiseykerdişê xo de tecrîtê girankerde şermezar kerd û vat: "Hemverê rayberê ma 22 serrî yo tecrîdêk esto û ganî ma destûr nêdê nê çî. Hemverê tecrîdî ganî ma vengê xo berz bikerê û sere wedarnê. Îqtîdarê AKP û MHP fikr û fehmê ci ra terseno. Semedê nê zî tecrîd giran keno. Ez na bawerîye de ya ke eke tecrîd peynî bibo, do welat de xeylêk kêfweşî virazyo. Bi şikinayîşê tecrîd û azadîya ey do îqtîdarê AKPyî birijno."

 

'Cinîyan xeyrê serekî bîyayîşê xo nas kerd' 

 

Kiymete wina bale ant serê rol û mîsyonê cinîyan: "Cinîyê kurd bi xeyrê serekî ewro bîyayîş û heqê xo nas kenê. Eke serek nêbîne cinî her ware de nêeşkayîne ca bigirewtêne. Cinî hemverê nêheqî û zulmî şer kenê. Tecrîdê serê serekî, tecrîdê serê cinîyan o. Ganî ma serekê xo azad bikerê. Serekê her çar parçeyê Kurdistanî yo. Ganî wayîrvejîyayişêk wina zî bibo. Azadî bê serekî bi ca nîna."

 

'Îqtîdar wazeno ke bi tecrîd kurdan çin bikero' 

 

Geyîsa Dayan zî dewlete zulm kena û vat: "Zulm bi ma û tutanê ma kenê. Tutanê ma kişenê. Dewleta faşîst her hat ra hêriş kena. Ma serekê xo wazenê. Ma wazenê tecrîdê ser serekî bêro wedaritiş û azad bibo. Tecrîdo girankerde tesîr zîndanan zî keno. Ma heqê xo wazenê. Ma zî kurd ê û heqê ma yê cuye zî esto. Ma wazenê serekê ma  azad bibo û cuyêka weş awan bibo. Dewlete mabêne şarê Kurdî de dişminî awan kena."

 

'Seba weşîya serekê xo bi endîşeyîn ê'

 

Geyîsa tewr peyîn wina vat: "Dewlete bîyayîşê kurdan qebûl nêkena. Çar hetê Kurdistanî ra hêrişê herra ma kena. Herra înan nîya. Ma cuyêka azad û weş wazenê. Ma weşîya serekê xo ra bi endîşeyîn ê. Ma azadîya serekê xo wazenê. Do serkewtiş ê şarê kurdî bibo."