Rojda Aydin  

 

ŞIRNEX - Reaksîyonê hemverê îşkenceyê Zîndanê Tepişteyê Tîpê T yê Şirnexî dewam keno. Keyeyê tepişteyan dîyar kerd ke rewşa tepişteyan baş nîya û vatî: "Wa derheqê hêrişkaran de cipersayîş abikerê. Ganî keyeyî semedê tepişteyanê xo wurzê serê lingan û wayîrê tepişteyanê xo vejîyê."

 

Zîndanê herême û Tirkîya de binpaykerdişê heqan her ke şino zêde beno. Nê zîndanan ra Zîndanê Tîpê T yê Şirnexî yo. 24 û 25ê teşrîna verêne de mudur û gardîyan eşt serê qawişê ke 16 tepişteyî estê. Tepişteyî bi hêrişê gardîyanan dir rî bi rî mendî. Xeylêk tepişteyî bi giranî birîndar bî. Sewnîna tepişteyê ke bi giranî birîndar bî wedarnayî nêweşxane. Keyeyê tepişteyan ke bi merdimanê xo dir pêvînayîş kerdî, reaksîyon vera rewşe dayî û vatî rewşa tepişteyan ra xeylêk biendîşeyîn ê.

 

'Mudur û gardîyanan eştê serê qawişan' 

 

Hemsereka Partîya Demokratîke ya Şaran (HDP) a Şirnexî Sabuha Akdag ke pîyê ci Alî Akdag zîndanê Şirnexî de bi 2 serrî û 4 mengî yo tepişte yo û 6 serrî û 3 mengî ceza dayê ci dîyar kerd ke mudur û gardîyanê zîndanî erzenê serê qawişan û wina vat: “Mudur û gardîyanê zîndanî reyke de eştê serê qawişan. Zîndan de 16 tepişteyê sîyasî estê. Qawişê ke tepişteyê sîyasî manenê di beş ê. Gardîyanan waşto ke bi solanê xo cigêrayîş bikerê. Labelê tepişteyan vato, uca cayê nimaj û rakewtişî yo ma destûr nêdanê. Dima ra gardîyanan vato serê lingan de bimarê. Labelê tepişteyî vera nê vejîyayê. Nê ser de gardîyanan hêriş kerdo û xeylêk tepişteyî  birîndar bîyê. Zîndan de di tepişteyê emrê înan pîl esto. Tepişteyê bînan xo eşto serê înan ke înan kuyayîş ra bipawê. Derb ra tepişteyêk zince ci û tepişteyêk zî milê ci şikyayo û tepişteyê bînî bi giranî birîndar bîyê. Nê kesê birîndar bîyê berdê nêweşxane. Tepişteyo bi nameyê Mehmet Alî Çevîk nika beşê giran de yê. Tepişteyê ma bi hawayêk wehşî derp kerdê.”

 

'Hemverê zulmî ganî ma vengê xo berz bikerê'

 

Bedriye Înediya ke lajê ci Celal Înediya ke 3 serrî yo tepişte yo û 12 serrî ceza ci rê ameya dayîş, dîyar kerd ke lajê ci zî ameyo derpkerdiş û wina vat: “Xora ez roja îne amebîya pêvînayîşê girewte. Vizêr mi gêra û vat, gardîyanan hêrişê înan kerdo. Embazê înan birîndar ê û rewşa înan nêbaş a. Lajê mi vat ke reyke de eştî serê qawişan û hêrişê înan kerd. Waştişê înan oyo ke semedê pêvînayîşê parlamenter û avûkatî şêrê zîndan û cigêrayîş bikerê. Lajê mi vat, her siba yenê ma îşkence kenê. Çend tepişteyî birîndar bîyê. Hîn kesan zince înan û hîn kesan milê înan şikiyayê. Rewşa înan nêbaş a û tehluke de ya. Ma nê çî qebûl nêkenê. Ganî heme keyeyî û dayîkê tepişteyan bêrê zîndan. Ganî hemverê zulmî vengê xo berz bikerê. Ma nê îşkence qebûl nêkenê.”

 

'Ma wazenê edalet bi ca bêro'

 

Fadîle Olmez ke birayê ci Mesut Olmez 4 serrî yo zîndan de yo û 10 serrî ceza ci rê ameya dayîş û vat: "Cayê înan nêbaş o. Zulm û îşkence bi înan kenê. Birayê mi vat, îşkenceyêk pîl bi înan yeno kerdiş û ganî kes bêveng nêmano. Waşt ke heme kes teber de veng vejo. Ma nê îşkence qebûl nêkenê. Rewşa zîndanan xeylêk xirab a. Zulmêk pîl serê înan de esto. Birayê mi vat ke zince embazêk û milê embazêk ci şikîyayo û wedarnayê nêweşxane. Ê tepişteyan ra yew beşê giran de yo û embazêk înan do emelîyat bibo. Birayê mi zî derb werd o. Ma nê zulmî qebûl nêkenê. Wa no îşkence bêro vindarnayîş. Ganî şarê Kurdî û keyeyê tepişteyan wurzê serê lingan. Çîyêk bêro sereyê tepişteyan berpirsîyar ê yê. Ma wazenê edalet bi ca bêro û derheqê hêrişkaran de cipersayîş bêro kerdiş. Ma bi xoverdayîş eşkenê peynîya nê zulmî bîyarê. Ma wazenê no zulm peynî bibo."