Medya Uren

 

MÊRDÎN - Esnafê cinî Mêrdînijî binê fatureyê awe, ceyran, gazê xozayî û kîra de fetisyayê nêeşkenê debara xo ya rojane bikerê wina vatî: "Ma êdî nêeşkenê biciwîyê û kesê ke vanê ekonomîya Tirkîya baş a zûran kenê.” 

 

Êdî welatijî tena rojane fikrîyenê û fek ameyoxê xo ra vera dayê. Bi krîzê ekonomî dir hûmara feqîrî roj bi roje zêde bena. Welatijê ke binê fatureyê awe, ceyran, gazê xozayî û kîra de fetisyayê nêeşkenê debara xo ya rojane zî bikerê. Esnafê Mêrdînijî rewşa bîyaye ra gerreyox ê. Esnafê cinî rewşa ke mîyan de yê ajansê ma rê qal kerdî. 

 

‘Ma nêeşkenê debara xo bikerê’

 

Muhbet Karaaslan (53) ke tena ciwîyena wina vat: "Ez kesêke bi tena ya, rewşa mi goreyê xeylêk kesan tewr baş a. Semedo ke tutî çin ê. La ez êdî bi xo nêeşkena debara xo bikerî. Semedê di quruşan ez serê siba heta şan de xebityena. Rojê 20 TL qezenç kena. O zî qîmê çîyêk nêkeno. Tenekeyê rûnî bîyo 350 TL. Fiyetê bacanan zî perayo. Pereyê tirkî bê qedir bi û ma hetê ekonomî de kewtî zehmetiyan. Ma pereyê ke qezenç kenê zî danê fatûreyê ceyran, awe û gazê xozayî. Nika pêro ma rê bî luks.”

 

‘Yê ke vanê ekonomî baş a zûran kenê’

 

Cahîde Bîlen zî bi rotişê cil û ceyîz debara xo kena wina vat: "Ma sey esnaf ne çîyêk girewtişî ne zî rotişî ra fam kenê. Wexto ke ma çîyêk roşenê ma vanê ma qezenc kerdo. Labelê ez kîra û ceyran dana. Xora hende zam yeno kerdiş ez nêeşkena fatureyan zî bidî. Rewşa ma ya ekonomî êdî baş nîya. Esnafî ver bi mergî şinê. Ma zirar de yê. Yê ke vanê ekonomîya tirkan baş a zûran kenê.”

 

‘Ez êdî nêeşkena bigîrî’

 

Esma Gokdemîr zî bi rotişê ardanî debara xo kena wina vat: "Ma sey esnafî na rewşe ra aciz ê. Ez nêeşkena rotiş bikerî û ez nêeşkena çîyêk zî bigîrî. Xida, ardan, ceyran û her çî bîyo vay. Tena feqîrî bi tesîr benê, la dewlemendî rewşe ra tu wext zirar nêvînenê. Ma pêro kesê feqîr ê. Ma kîra danê la ma êdî nêeşkenê heqê kîra zî vejê.”

 

‘Bajar de tewr zêde vayî yena hîskerdiş’ 

 

Mulkîye Erguven û Cemîle Erguven ke dewe ra ameyê derheqê vayî de nêrazîbîyayîşê xo ramojnayî û vatî: “Ma dewe de şiwanî û bêrîvanî kenê. Ma bi pesdewarî debara xo kenê. La çi heyf êdî no zî qîm nêkeno ke ma bi rehetî nanê xo biwerê. Ma kîra de nîyê. La wexto ke ma yenê bajar ma krîz hîs kenê. Ma nêeşkenê çîyêk bigîrê.”