Medya Uren

 

MÊRDÎN - Cinîyê Nisêbînî derheqê 30 serrî cezaya zîndanî ya Vervatoxa Demî ya TJAyî Ayşe Gokan ameya dayîş, fikrê xo ardî ziwan. Cinîyan vatî: "Ayşe semedê Nisêbîn û heme herême bi taybetî zî xizmetê cinîyan û kurdewarî de kedêke pîl da.

 

Tepiştişê Ayşe dişminîyê kesê ke ceza birnayê, ramojneno. No dişminîyê hemverê kurdewarî û cinîyan o. Labelê ma vanê, 'Ma cinî yê, kurd ê û ma tîya tê!"

 

23in roniştişê dewaya Vervatoxa Demî ya Tevgerê Cinîyan ê Azadan (TJA) Ayşe Gokkan ke bi îdiayê "îdarekerdişê rêxistinî", "endamîya rêxistine" amebî akerdiş, 9in Dadgeha Cezaya Giran ya Amedî de ame vînayîş. Dadgehe 30 serrî  ceza Ayşe Gokkan rê da. Derheqê  cezaya ameya dayîş de cinîyê kurdî  bi rojan o nêrazîbîyayîşê xo ramojnenê. Cinîyê Nisêbînî ke Ayşe Gokan uca de serekîya şaredarî kerda zî reaksîyon vera qerarî dayî û vatî, kes nêeşkeno ma bêveng bikero.

 

'Ma cinî yê, kurd ê û ma tîya yê!'

 

Hemsereka DBPyî ya qezaya Nisêbînî Bedia Adiguzel sere de bale ant serê xebatanê Ayşe û wina vat: "Ayşe 40 serrî yo semedê cinîyan û semedê şarê kurdî têkoşînê rûmetî da. Aye her wext rayîrê heqîqetî de waşt ke semedê  berjewendîyê şarî têbigeyro. Wayîrê îrade bî, têkoşer bî. Bi taybetî zî  Nisêbîn de ma bî şahidê na keda ya. Aye Nisêbîn kerd bajarê cinîyan. Xeylêk probleman safî kerd û xeylêk projeyê semedê kurdan û cinîyan kerd. Waştî bi dayîşê ceza xebata aye ya rûmetî îlegalîze bikerê. Waştî cinî û sîyasetê kurdî îlegalîze bikerê. Ma hemverê qerarê ameyê dayîş ê. Sey birêz Ayşe vana; ma cinî yê, ma kurd ê û ma tîya yê. Ma do Ayşe bi tena nêverdê. Ma do têkoşînê ci pîl bikerê."

 

'Waştê sîyasetê cinîyê kurdî tasfîye bikerê' 

 

Çalakgera TJAyî Remzîye Bayhan dîyar kerd ke cezadayîşê Ayşe Gokkan rê darbeyêk vera cinîya kurdî ya û wina dewam kerd: "Ma sey cinîyê TJAyî Ayşe nas kerdêne  û Nisêbînî zî ma bî şahidê metodê sîyasetê ya. Aye bi taybetî semedê cinîyan rayberî kerd. Bî serekê şaredarîya Nisêbînî. Ma pê zanê ke sîyasetê aye sîyasetê legalî yo. Sîyasetê aye sîyasetêk kurdewarî û demokratîk bi. Semedê welatêk cinîyan rê awan bikero heta nika têkoşîn kerd. Wazenê bi tepiştişî siyasetê cinîyan ê kurdan, sîyasetê kurdewarî asteng bikerê. Ê vanê, ma do bi tepiştişê înan sîyasetê cinîyan ê kurdan tasfîye bikerê. La ma do tasfîye nêbê. Ma do newe ra pîl bê. Zîndanan de û teber de ma do têkoşînê xo pîl bikerê."

 

'Ma do tim uca de bê'

 

Endama Meclîsê Dayîkê Aştîye Cemîle Akbay zî reaksîyon ramojna û vat: "Ma xemgîn ê, semedo ke ma vînenê her roja ke şino ne demokrasî ne zî aştî manena. Na cezaya ke Ayşe Gokan rê ameya dayîş, nîşaneyê demokrasîyê Tirkîya yo. Ayşe zî hemverê nê bêdemokrasî têkoşîn kerd. Ma nê qerarê dayîşê ceza şermezar kenê. Ma nê qerarî nas nêkenê. La wa bêro zanayîş ke ma do fek têkoşînê xo ra vera nêdê. Ma do pîya wayîrê têkoşînê Ayşe vejîyê. Ma do tu wext bêveng nêmanê. Seke Ayşe vana; ma cinî yê, ma kurd ê û ma tîya yê."