AMED - Esnafê Bazarê Cinîyan ê  Semtê Jiyanî yê Amedî dîyar kerd ke xeylêk reyan bi cebo veng agêrênê keyeyê xo û vatî: "Welatî yenê ewnîyenê vayî ra û şinê. Êdî ma ne eşkenê biroşê û ne zî eşkenê bigîrê."

 

Tirkîya de krîzê ekonomî her ke şino giran beno û tesîr pêro cuye keno. Sere de vayîye gazê xozayî, ceryan û awe welatijan no mewsîmî de keno mîyanê endîşeyan. Semedê fatureyan êdî welatî werd û şimitişê cil û belgan teserûfî kenê. Esnafê Bazarê Cinîyan ê Semtê Jiyanî ya Rêzanê Amedî xebityenê, derheqê krîzê ekonomî de fikrê xo ajansê ma rê qal kerdî.

 

'Krîz ra zêdeyêr esnafî mexdûr benê'

 

Gurbet Demîr ke 9 serrî yo bazar de ya wina vat: "Gama mi newe dest bi kar kerd, karê ma baş bi. Ma eşkayîne debara xo bikerê, labelê ma nika nêeşkenê dayîş û girewtiş bikerê. Heme çî bîyo vay. Ma nêeşkenê sebzeyanê xo biroşê. Muşterî zî hemverê vayîye aciziyê xo anê ziwan la destê ma ra çîyêk nîno. Ma zirar kenê. Ma mecbûr manenê erjan biroşê, la ma rê çîyêk zî nêmendêne. 5 tutê mi estê. Bi tena sereyê xo ez hewl dana ke debara keyeyê xo bikerî. Heme lazimîyê tutanê xo ê keyeyî ez bica ana. Hal de zî ma cinîyan rê vayroşenê. Labelê camêrdan rê erjan roşenê. Ma na rewşe ra aciz ê û ma bêtêduştî qebûl nêkenê."

 

'Eke wina dewam bikero ma do mecbûr agêrê keyeyê xo'

 

Cinîya bi nameyê Guneşe ke nêwaşt peynameyê xo vajo wina vat: "20 serrî yo ez hewl dana ke debara keyeyê xo bikerî. Mi bi îmkanê xo tutê xo pîl kerdî. La nika êdî cuye hende bîya vay, ma nêeşkenê debara xo bikerê. Xeylêk çî vay bîyê. Hem muşterî nêeşkenê bigîrê, hem zî ema nêeşkenê biroşê. Muşterî wazenê erjan bo la ma zî hal ra vay gênê. Ma nêeşkenê berardişanê xo biroşê. Destê ma de manenê. Eke na rewşe û krîz dewam bikero ma do mecbûr agêrê keyeyê xo."

 

'Ma bi cebo veng şinê keye' 

 

Necla Kaplan zî nêzdîyo 2 serrî yo bazar de xebityena wina vat: "Ma  pereyêk zêde nêgînê. Ma serê siba ra heta şan de xebityenê. Ma nêwazenê muxtacê tu kesî bibê. Ma wazenê serê lingan de bimanê la krîzê ekonomî serê ma de zaf tesîr kerd. Ma zaf tay qezenc kenê. Verê mûşteriyan ameyîne 3 kîlo girewtêne la nika nîm kîlo gênê.  Ma xeylêk rey bi cebo veng agêrênê keye. Heme kes mexdûr o. Çi heyf cinîyî bazar de zî bindest ê. Ma semedo ke bindest û muhtac nêbê ma xebityenê. Wa wareyê ekonomî de bêtêduştîyê cinî û camêrdan nêro kerdiş. Ma êdî nêeşkenê fatureyanê xo zî bidê. Hem gazê xozayî û hem kimor vay bîyo. Heme heqdestê ma bacayan rê şino."

 

'Welatî yenê vayî temaşe kenê û şinê'

 

Tewr peyîn zî Salîha Yavûz ke 4 serrî yo bazar de xebityena wina vat: "Ma bazar de şert û mercê xiraban de xebityenê. Karê bazarî sey karê camêrdan yeno vînayîş. Sey karêkê bi hêzê fizîkî yeno vînayîş. Goreyê rewşa ekonomî karê ma zî vuryeno. Nika kartol û pîyaz zî bîyê vay. Xeylêk kesî wextê şandînan gama ke bazar yeno padayîş, yenê. Semedo ke erjan bigîrê. Xeylêk çî destê ma de manenê û ma mecbûr manenê birijê. Ganî selahîyetdarê dewlete îmkanê ekonomî semedê şarî viraznê. La vera nê çîyan kenê vay."