RIHA - Emîne û Ferît Şenyaşar ke 9ê Adare ra verê Edliyeyê Rihayî de nobeta edaletî dewam kenê vatî: "Amancê bîyayîşê dewlete oyo ke hemverê welatijan de adîl bo."

 

Emîne Şenyaşar û lajê xo Ferît Şenyaşar ke 9ê adare de, semedê ferdê keyeyê xo yê ke hetê merdim û pawitoxê Parlamenterê AKPyî yê Rihayî Îbrahîm Halîl Yildiz ra amebî qetilkerdiş, verê Edlîyeyê Rihayî de Nobeta Edalatî dayî destpêkerdiş, roja 226ine de nobeta xo dewam kerdî. Saetê serê sibayî de keyeyî verê edlîye de û "Quncikê Edaletî yê Keyeyê Şenyaşarî" de dest bi nobeta xo kerdî. 

 

'Wa Komîsyonê Cigêrayîşî yê  Meclîsî awan bikerê'

 

Keyeyî serê hesabê xo yê medyaya dîjîtalî nê pare kerd: "Sebebê bîyayîşê dewlete oyo ke seba welatijan bi dadmendî têbigeyro. Cayê kesê ke nêweşxaneyê dewlete de qirkerdiş kerdê Parlamento yo. Wa Komîsyonê Cigêrayîşî yê Meclîsî awan bikerê. Wa serebût bi hawayêke hîra bêro cigêrayîş."