Rojda Aydin 

 

ŞIRNEX - Xeylêk keyeyî zêdebîyayîşê xebitnayîşê tîryakî yê qezaya Cizirî ra gerreyox ê û nînan ra yew zî Selamet Tetîk a. Selamete semedê lajê xo tîryakî ra bixelisno, xeylêk têkoşîn kerdo û vat: "Mi muracatê dozgerî kerd la mi ra vat, 'Xora no tut şîyo, fek ci ra vera bide wa şêro.' Dewlete wazena ciwananê ma bi tîryakî bikişo. Ganî ma tutanê xo rê wayîr vejîyê."

 

Pêwa polîtîkayê şerî yê taybetî, krîzê ekonomî, betalî û feqîrî tesîrêk pîl welatijê herême keno. Bi taybetî zî ciwanî bi tesîr benê. Kuçeyan ra heta qezayan, qezayan ra heta bajaran ciwanî nika bi torra tiryakî  re hatine hedef girewtiş. Yew zî nê  cayan ra Cizîrê Şirnexî yo. Demê peyîn de qeza de tîryakî bîyo zêde. Selamet Tetîk Cizîr de ciwîyena û lajê ci tîryakî xebitneno. Selamete ajansê ma rê qalê rewşe xo kerd.

 

'Bi zanabîyayîş herême de tîryakî yeno averşîyayîş' 

 

Selamete qiseykerdişê xo de bale ant serê tesîrê ekonomî û nêzdîbîyayîşê dewlete ya hemverê herême û vat: "Tirkîya de krîzê ekonomî zêde bîyo. Merdim nêeşkeno êdî debara xo bikero. Her çî xeylêk vayo. Tu kar çin o ke tutê ma bixebityê. Semedê kar çin o rewşa keye û tutan hetê ekonomî  de xirab o. Bi taybetî zî keyeyê herême tesîr benê. No çi bi taybetî herême de bi tesîr o. Dewlete cîya nêzdîyê herême bena. Nika xeylêk ciwanê ma tîryakî xebitnenê. Verê tîya de çinbi, tena metrepolê Tirkîya de estbi. Nika Cizîr, Silopî, Hezex û Şirnex de xeylêk kesî tîryakî xebitnenê. No zî bi zanebîyayîş herême de yeno kerdiş."

 

'Mi ra vatî fek lajê xo ra vera bide' 

 

Selamete wina dewam kerd: "Werrekna nika lajê mi biameyîne tepiştiş. Ceza dayîş na rewşe de tewr baş a. Belkî wina tîryakî ra dûr bikewo. Sewbîna ez o bizanî ke lajê mi ça de yo. Ez veng dana dayîkan wayîrê tutanê xo vejîyî. Sewbîna mi derheqê rewşa lajê xo de muracatê dozgerî kerd la dozgerî mi ra vat, 'Xora no tut şîyo, fek ci ra vera bide wa şêro.' Senî dozgerîyêk wina vano. Ez o senî fek lajê xo ra vera bidî. Dima ra zî mi ra vat, 'Şore wayîrê lajê xo vejî.' Eke cezayêke bidê lajê mi belkî fek tîryakî ra vera bidê. Verê qet no çi çinbi, la nika ciwanê ma mîyanê tîryakî de yê."

 

'Dewlete bi tîryakî ciwananê ma kişena'

 

Selamete veng da keye û dayîkan û vat: "Ganî no problem bêro çareserkerdiş. Ma nê çî qebûl nêkenê. Vengdayîşê mi dayîkan ra oyo ke wayîrê tutanê xo vejîyê. Bêrê ma pîya wurzê serê lingan. Vera nê çî ma bêveng nêmanê. Dewlete wazena ciwanê ma bi tîryakî bikişo."