ANQARA - Vervatoxa HDPyî Ebru Gunay îfade kerd ke plan û gefê hêrişî îqtîdarî yê vera Rojawanî semedê xelisnayîşê xo yo û vat: ''Kişîyayîşê sîyasî zî pê vervejîyayîşê şerî eşkenê bêrê astengkerdene.''

 

Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de rojdem ercna.

 

Qiseykerdişê Ebrû Gunay bale ant serê serrgêra awankerdişê partîya înan û vat: "Ez serrgêra 9. ya ronayîşê HDPyî fîraz kena. HDPyî ronayîşê xo ra nata sîyasetê welatî de vurnayîşê bingeyî kerdî, nefes da şaran. Ma mojna ke no îqtîdar eşkeno bêro binkerdene. 7ê hezîrane de û 31ê adare de ma no îsbat kerd, ma do reyna ser bikewê. Ma bi coşî têkoşînê xo rê dewam kenê.

 

Îqtîdar reyna qala şerî keno. Krîzo ekonomîk esto, wendekarî teber de mendî, vera arêdayoxanê kaxitan şer esto, kişîyayîşê cinîyan nêqedîyeno. Welat de hêzê paramîlîterî bi rehetî têgêrenê la îqtîdar reyna gêreno şer. Hewteyêk verî ewil Erdoganî dima zî Çavuşogluyî Rojawanî rê gef wend. Putin meseleya Îdlîbî de ultîmatom dano ê Rojawanî rê gef wanenê, Bidenî reyde ronişenê dima reyna Rojawanî rê gef wanenê.

 

Tek derdê nê îqtîdarî şerkerdiş o. La bedelê şerî şar dano. Şar kar, werd wazeno, ciwanî ameyoxî wazenê, wendekarî perwerde wazenê la îqtîdar vano şer.Destê înan de têna şîdet û zorbazîye menda. Ê wazenê welatî tabifînê û wina îqtîdarê xo rê dewam bikerê. Wa şar rayîr medo nê manîpulasyonî. Şer qetî çareserîye nêbeno. Îqtîdar semedo ke reyna rayaumûmîye teng bikero polîtîkayanê asayîşî ferz keno.

 

Ma wazenê bivisnê vîrê îqtîdarî ke şima do şorê, şer zî nêeşkeno şima bixelisno. Şima sûcê pîlî kerdî, welat eşt mîyanê adirî. Nê rojan de ancî kişîyayîşê sîyasîyî yenê nîqaşkerdene. Ma weçînayîşanê 7ê hezîrane û 1ê teşrîna peyêne de dî ke nê welatî de sûcê giranî senî ameyî kerdene. Kişîyayîşê sîyasî zî pê vervejîyayîşê şerî eşkenê bêrê astengkerdene."