AMED - Zîndanê Amedî de teda û şîdetê serê tepişteyan zêde benê. Tepişteyan vengvetişê hemverê nê tedayan veng dayî.

 

Zîndanê Vakur û Tirkîya de binpaykerdişê heqan her ke şino zêde benê û bi taybetî demê peyîn de no resayo sewîyeya tewr cor. Tepişteyî bi rayîrê telefonî bi keyeyê xo dir  teda, îşkence û şîdetê hemverê înan yeno kerdiş qal kenê labelê selahîyetdarî nê çî peygoş kenê.

 

Zîndanê F1 û F2 de binpaykerdişê heqan zêde benê û tepişteyî bi rayîrê pêvînayîşê keyeyê xo dir anê ziwan ke îşkenceyê sîstematîk ê zîndanan zêde benê. Tepişteyî vanê; "Qesênayîşê yewtîp yeno ferzkerdiş. Awe germe nêna dayîş. Bi kêfî erzenê serê koxuşan. Werd baş nêyo û tedawîya tepişteyê nêweşan nêna kerdiş. Gardîyanan rojêke ber serê ma de kilît kerdî û vatî, 'tîya de vatişê ma derbaz beno û ma eşkenê her çîyêk wazenê bikerê."

 

Tepişteyan hemverê caardişê serê înan de vengdayîşê paştdayîşî kerdî û waştî tena nêrê verdayîş.