COLEMÊRG - 13ê teşrîna verêne 2019ine de demo ke hêrişê komê girêdayê dewleta tirkî yê serê Girê Spî dewam kerdêne de Dilovan Gever dinyaya xo bedilnaye. Serê mergê Dilovane ra 2 serrî derbaz bi.

 

Çarin roja hêrişê dewleta tirkî û komê girêdayê ci 9ê teşrîna verêne 2019 de hemverê Vakur û Rojhelatê Sûrîye amebi destpêkerdiş, rojnamegere Dilovan Gever (Dîlan Olmez) demo ke embazanê xo dir xeberan taqîb kerdêne, bi bombavaran dinyaya xo bedilnaye. Dilovane ke Endama Merkezê Îrtibatî ya Çapemenîya ya Yewîneyê Pawitişê Cinîyan (YPJ) bî serra 1994 de dewa Moreyî ya Geverê Colemêrgî de ameye dinya. Tena xeyalê Dilovane o bi ke bibo rojnamegere. 

 

Dilovane ke beşê Xizmetê Îstîmlakî yê Îdarekerdişê Herêmî ya Unîversîteya Selçukluyî ya Konyayî qezenc kerd, serê waştişê keyeyê xo semedê wendişî şî Konya. Labelê 2014ine de hemverê hêrişê DAÎŞî Îrtibatê Çapemenîye ya Yewîneyê Pawitişê Cinîyan (YPJ) de cayê xo girewt û xeyalê xo rojnamegerî bi ca ard.

 

'Rîyê aye her tim huyayîne'

 

Merdimê Dilovane dîyar kerdî ke 5 wayê û birayê aye bîyê û mîyanê înan de tewr zêde Dilovane parekerdiş ra hes kerdêne û vatî: "Wexto ke aye rê xelatêke ameyîne vernê de wayê û birayanê xo dir pare kerdêne. Aye parekerdiş ra zaf hes kerdêne. Xeylêk rey werdê xo ma dir pare kerdêne û vatêne, 'Xora ez werd tay wena.' Rîyê aye her tim huyayîne. Wexto ke ma aye dîne kelecanêke zerrîya ma de girewtêne. Rojê nêbaş de zî moralê ma her tim baş bi. Wexto ke aye beşdar bî, ma xeylêk dîmenê ci dîne. Huyayîş û kelecanê aye uca de zî kêm nêbibi. Sey her wext rîyê ci huyayîne û bi kelecan bî."

 

Xeyalê aye o bi ke bibo rojnamegere 

 

Merdimê Dilovane dîyar kerdî ke Dilovane waşto hetê ekonomî ra keyeyê xo rê bibo hetkar û wina vat: "Pîyê Dilovane waştêne ke aye bibo  mamoste. Labelê xeyalê aye o bi ke bibo rojnamegere. Pîyê aye nêwaştêne bibo rojnamegere û bîne asteng. Dilovane semedo ke wayîrê kelecanêke pîl bî her wext vatêne, 'Ez o bibî rojnamegere. Xeylêk  cayan bigeyrî û xeylêk çîyan bimusî.' Dima ra ke ma eşnawit Dilovane bîya rojnamegere ma vat, aye resa xeyalê xo. Ma pêro serê nameyê ci de kêfweş bî."