ANQARA - Dayîka Aştîye Aysel Tufan ke paştdayîş da grevê vêşanîye yê bi waştişê wedaritişê  tecrîdê serê Rayberê PKKyî Abdullah Ocalanî de bêro wedaritiş, amebi destpêkerdiş û bi şîdetê polîsan dir rî bi rî mendebî. Cipersayîşêk ke derheqê babete de amebî destpêkerdiş, qerarê bêtaqîbkerdişî da. No ser de avûkatan dosya berd Dadgeha Destûrê Bingehîn. 

 

Tepişteyê ke 2018-2019 de bi amancê protestokerdişê tecrîdê serê Rayberê PKKyî Abdullah Ocalanî, kewtibî grevê vêşanîye. Bi amancê paştdayîşê çalakîya Dayîkê Aştîye Parkê Koşuyolu yê Amedî de çalakî kerdibî û bi hêrişê polîsan dir rî bi rî mendibî. Hêrişan de dayîka Aştîye Aysel Tufan xo de şîbî û berdibî nêweşxane, dima ra zî derheqê polîsan de muracatê sucî ame kerdiş.

 

Bi hemkarîya Merkezê Heqê Cinîyan ê Baroyê Amedî, Komeleya Huqûqnasê Semedê Azadîye (OHD) û avûkatê Komeleya Heqê Merdiman (ÎHD) yê Amedî muracatê serdozgerîya Komare ya Amedî de amebi kerdiş û dima ra walîtî ra derheqê polîsan de destûrê cipersayîşî ame waştiş. Walîtî destûr nêda cipersayîş. Avûkatê ÎHDyî nê ser de Dadgeha Îdarî ya Herême ya Dîlokî îtîraz kerd. Dadgehe vat, ganî goreyê usulî cipersdayîş bêro kerdiş û qerar wedarna.

 

'Dozgerî qerarê redî da'

 

Serdozgerîya Komare ya Amedî derheqê şîdetê ke dîmenan de ame vînayîş de, qerarê, ‘hewceyê cipersayîşî çin o' da. Dozgerî îdia kerd ke polîsa ke şîdet Aysele rê kerdo, suc nêkerdo û vat, xêrcê  îfadeyê Aysele delîl çin o. Avûkatî 18ê çele de îtîraz kerdî. 4in Dadgerîya Cezaya Sulhî ya Amedî 11ê adare de îtîraz red kerd.

 

Avûkatan muracatê DDB kerd

 

No  ser de avûkatan şîdetê polîse berdî Dadgeha Destûrê Bingehîn (AYM). Muracat de ame dîyarkerdiş ke heqê rayrayîş, nawnayîş, kombîyayîş û azadîya fikr û fehmî ameyê binpaykerdiş û sewbîna cipersayîş bi tesîr nêameyo kerdiş. Heto bîn ra ame dîyarkerdiş ke ganî qerarê ameyê dayîş bêrê wedaritiş û derheqê gumanbaran de cipersayîşêk bi tesîr bêro kerdiş.