Medya Uren

 

MÊRDÎN - Fexrîye Alpaslan ke bi serran o semedê heqê kurdan têkoşîn kena, seba dêsê ke mabêne  Qamişlo û Nisêbînî de ameyo berzkerdiş wina vat: "Dêsê şermî serê sîneyê welatê mi de berz kerdî. Şarî bi serewedaritişê xo cewabêke xurt da. Ez zana ma do pîya nê dêsan birijnê. Heta ke ez ê rojan nêvînî lazim o na dinya ra koç nêkerî."

 

Bajarê Nisêbînî ke tarîx de nameyê xo bi serberzî nuşt, bi kelayê xoverdayîşî û no heta ewro zî dewam keno. ev heta roja me ya îro jî didome. Dêso ke mabêne Nisêbîn û Qamişloyî de ame berzkerdiş Fexrîye Alpaslan (63) wina qal kerd: "Înan vat qey do kurdan yewbînan ra dûr bifînê û ma mîyanê sînoran de yewîya xo ramojna."

 

Xebatê viraştişî dêsî yê bi nameyê; "vernîgirewtişê qaçaxçîtî"de amebi destpêkerdiş, bi hewildayîşê Şaredarîya Nisêbînî amebi vindarnayîş. Labelê xebatê kolnayîşî 13ê teşrîna verêne 2013 de reyna amebi destpêkerdiş. Sereka Şaredarîya Nisêbînî ya ê demî Ayşe Gokkan serê sînorê Nisêbîn û Qamişloyî de çalakîya roniştişî dabî destpêkerdiş û kewtebî grevê vêşanîye. Dima ra nê grevî açarna rojeyê mergî. Dimayê ke humatî vatibi, 'do dês nêro viraştiş' roja 9ine de Ayşe grevê xê peynî kerdibi. Ayşe o wext wina vatibi: "Dewleta tirkî Rojawan xo rê sey tehdîdêk vînena û wazena şorişê uca biqedêno. Bi awankerdişê dêsê şermî yeno waştiş ke şarê Rojawanî bêrê îzolekerdiş û ameyîşê şarî bêro astengkerdiş. Hêzê dêsan do qîmê yewîya şarî nêkero."

 

'Ma xeylêk Ezîz û Ezîze kerdî cangorî' 

 

Fexrîye bale nat serê têkoşînê hemverê zulmî û wina vat: "Teşrîna verêne bi, dewlete hema newe dest bi dêsê xo yê şermî kerdibi. Ma roja yewin de vejîyayî meydanan. Ma xo eşt sînor. Ez û tutê xo pîya şî ware. Tutê mi vatêne, 'dadê emrê to pîl o ti şo.' Mi vatêne ez o zî, şima do zî pîya tîya bê." Fexrîye demo ke qalê ê wextî kerdêne axînêke zerrî ra ant û vat, xeylêk Ezîz û Ezîze bî cangorîyê na herre, ez extîyarêke bîya ma canê mi înan şêrîntir bi da ke hemverê zulmî têkoşîn nêkerî.

 

'Têkoşînê semedê azadî ma kelecanî keno' 

 

Fexrîye wina qalê kelecanîya xo ya a roje kerd: "Hîsêk wina weş ma dorpêç kerd ke ma vatêne ha Kurdî azad bî. Semedo ke nê şerî de yewî û xoverdayîş estbi, ters çinbi. Ma dej, rincanî û boya gazî hîs nêkerdêne. Seke ti vajê ma nê hîsê azadî ra mest bîyê. Serewedaritişê ma zî têkoşînê ma zî nê rayîrî de ma kelecanî keno."

 

'Ma reyke bîn hêzê yewîye dî'

 

Fexrîye dewam de wina vat: "Qamişlo de bi hezaran kesî hetê  bîn ê sînorî pirr kerdî. Bi sloganê ke eştêne hêz dayîne ma. Hetê ma ra zî yewîyêke xurt bî. Polîsan waşt ma asteng bikerê. Bi heme îmkananê xo hêriş kerdî. Xeylêk kesî înan dir kewtî mîyanê şer û yê bîn zî xo eştî sînor. Êdî polîsî tersayîne. Êdî êdî şer vila bîne. Awanîya Kultur û Hunerî ya Mîtanî de zî xeylêk kesî nobete de bî. Bi taybetî hêrişêk xidar serê înan de ame kerdiş û dorê înan dorpêç kerdî. Cinî, tutî, ciwan û camêrdî heme pêro ware de bî. Çiqas weş o ke yewîyêk wina û ruhêke wina de awan bi. Ma yewbînan pawitêne û ma wayîrê herre xo vejîyayîne."

 

'Lazim o ma kayê dişminî veng vejê' 

 

Fexrîye Dewa Qesrayî ya Serçixanî ya Qoserê Mêrdînî de ciwîyena û dewa ci verê sînorî de ya. Fexrîye wina vat: "Waştî ma yewbînan ra bivisnê. Waştî ma yewbîyayîşêk awan nêkerê. Ez û wayê xo yewbînan ra qût bî. La ma bi serewedaritişê xo cewabêke xurt da nê. Ma yew ê. Ma feydeyêk pîl yewîye ra dî. Werre bi a rojanû a yewîye. Ez zana her tim şarê Nisêbînî wina têkoşer o. Lazim o kayê dişminî veng vejê."

 

'Dêsê şermî serê sîneyê welatê mi de berz kerdî'

 

Fexrîye tewr peyîn wina vat: "Şarê ma bêters o. Xora her roje merg bi êimê xo dîne. Ma do tanq û topan ra bitersê. Heto bîn de wayê mi estê. Demo kedayîka mi dinyaya xo bedilna, semedo ke ma birînanê yewbînan derman bikerê, ma waşt yewbînan bivînê. Ma herdi şî Başûrê Kurdistanî ma yewbînan dî. Mabêne ma de çend metre esto la hende rayîra şî. Çîyo ke kenê bêwijdanî yo.  Dêsê ke mabêne ma de ameyê viraştiş, ma birijnê. Dêsê şermî serê sîneyê welatê mi de berz kerdî. Ez zana ma do pîya ê dêsan birijnê. Heta ke ez ê rojan nêvînî lazim o na dinya ra koç nêkerî."