COLEMÊRG - Avukat Mevlam Melezoglu dîyar kerd ke gumanbar Tacettîn G. ke hemverê tute/î hewldayîşê tecawuzî kerdibi, ganî sucê ‘asanî’ ra ney sucê ‘îstîsmarê cinsî’ ra bêrê muhakemekerdiş û mercîyê edlî semedê cigêrayîşî qîm nêkenê.

 

Qezaya Derencîkî ya Colemêrgî de camêrdo bi nameyê Tacettîn G. (25) 16ê Gulane de hewl dabi ke tecawuzê tutêke bikero. Dimayê ke keyeyî serebût ferq kerd, xebere da cendermeyan û gumanbar ame destbendkerdiş. Gumanbar sucê ‘îstîsmarkerdişê tute/î’  ra ame tepiştiş û berdîya Zîndanê Colemêrgî.

 

Dimayê ke gumanbar ame tepiştiş merdimê ci, teda keyeyê tute/î kerdî ke gerreyê xo peyser biancê.

 

Avûkat Mevlam Melezoglu derheqê dosya de ercnayîş kerd.

 

‘Keyeyê tute/î rewşa ke xo bipawê de yê nîyê’

 

Mevlamî dîyar kerd, roja serebûtî gumanbar şino keyeyê tute/î û tuwalet de fotografê nêbaş tute/î rê ramojneno û hewl dano ke tecawuz bikero û o wextî de pîyê tute/î rewşe ferq keno. Mevlamî wina dewam kerd: “Eynî roje de xebere dayî ma. Ma sey baroyê Colemêrgî şî cayê serebûtî. Netîceyê muşahadeyî de ma dî, pî astengdar o, dayîke rewşêka xo bipawo de nîya û yê bîn zî hema tut ê. Coka gumanbar zanayo ke eke çîyêk wina bikero do ceza nêgîro û bixo bawer bîyo. Semedo ke raştî zî mîyanê keyeyî de keso ke xo bipawo çin o.”

 

‘Ganî delîlî baş bêrê ercnayîş’

 

Mevlam dîyar kerd ke mercîyê edlî ameyê cayê serebûtî û vat: “Fotografê cayê hewldayîşê tecawuzî hetê ma ra kewt dosya. Cilê tute/î nêameyî girewtiş. Dosyayê wina de bidestkerdişê delîlan bi rastî zehmet o. Ganî delîlê ke dest de yê baş bêrê ercnayîş. Eke dosya de cilê mexdûre/î biameyîne girewtiş, eşkayîne cigêrayîşê DNAyî biameyîne kerdiş. La merciyê edlî nê cigêrayîş nêkerdê.”

 

‘Îfadeyî cîya bê zî caardişê serebûtî zelal o’

 

Mevlamî dewam de wina vat: “Gumanbar nika tepişte yo. Her çiqas cipersayîş ameyo destpêkerdiş zî, şahidan ra îfadeyê cîya bibê zî, esas oyo ke no serebût ameyo kerdiş. No raporê doktorî de esto. Semedê nê çarçewaya TCK 103 û 109 de îdianame ameyo amadekerdiş. Delîlê lazimî estê.”

 

‘Ganî îstîsmarê cinsî ra bêro muhakemekerdiş’

 

Mevlamî tewr peyîn dîyar kerd ke ganî gumanbar sûcê ‘îstîsmarê cinsî’ ra bêro muhakemekerdiş û bale ant serê raporê doktorî û vat: “Sewîyeya teşebusî bibo zî no yeno a mana ke suc pêroyî de ameyo kerdiş.”