Oznur Deger 

 

ENQERE - Elîf Ozdemîr ke qirkerdişê Garî de bi kênaya xo Ozgecan Zavar dir giranî birîndar bî wina vat: "Sebebê viraştişê mîtîngî têduştî bi. Hîso tewr weş yê dinya aştîye yo. Aştîye de; heskerdiş, azadî, empatî û fehm esto. Xeylêk çîyê bînan hewêneno."

 

Şahida qirkerdişê 10ê teşrîna verêne yê Garê Enqereyî Elîf Ozdemîr dîyar kerd ke pêwa 6 serrî derbaz bîyo, hema averşîyayîşêk çin o. Elîfe ke qirkerdiş de embaza xo Berna Koç û Sevgî Oztekîn vînî kerd, kênaya xo dir bi giranî birîndar bîbî.

 

'Ma waşt ma wisar biciwîyê' 

 

Elîfe bi vatişê, "Ma waşt ma 2015 de wisar biciwîyê' û vat: "Wareyê mîtîngî de bernameyê aştîye bibi. Her çî baş aver şîne. Girê kewt qirike ma, 6 serrî yo o girê hema zî anêbîyo. Ez ê dejî hema zî hîs kena. Semedo ke ma ê dîmenê wehşetî dî."

 

‘Gelo do key no girê abibo'

 

Elîfe wina qal kerd: "Gelo do key no girê abibo? Belkî zî demo edalet bi ca bêro. Hêvîya ma hetê edaletî de nêmende. 6 serran de hîn cezayî ameyî dayîş. La ê tena nêbî. Yê ke înan ardî uca, yê ke bî sebebê qirkerdişî, yê ke bî wesîle, çîyêk bi înan nêkerdî. Hewl dayî serê serebûtî padê."

 

'Dejê ma nêdîyê'

 

Elîfe vat, pêwa hayeya emnîyet û MÎTî qirkerdiş ra bi zî la serê ci padayî û vat: "Yê ke bî wesîleyê qirkerdişî estê. Nê bi  belgeyan vejîya werte. Pêwa nê çîyêk nêkerdî. Dadgehan de xeylêk çî ameyî qiseykerdiş. Prosesêk derg bi. Ma edalet waşt. Înan dejê ma nêdî, çin hesibnayî. Ma ameyî sewîyeyêk wina ke ma bêveng kerdî, nêverdayî ma qisey bikerê. La keso ke îtîraf kerd mabêne DAIŞ û leşkeran de mîyantî kerdo, nazik û kibar qisey kerdî. Ma nê heq nêkerd. Ma çîyêk nêbaş nêkerd. Ma tena aştî waşt."

 

'Hîso tewr weş aştîye yo'

 

Elîfe dewam de wina vat: "Ma dostê xo, embazanê xo vînî kerd. Bedenê înan parçe bi. Ancax yê ke nê biciwîyê na rewşe fam bikerê. Sey qirkerdişê verê. Bedelê Pirsûsî kamî da? Yê 12 êlule zî ci de. Kesî nêda. Sebebê mîtîngî aştî bi. O mîtîngê aştî bi. Hîso tewr weş ê dinya aştîye yo. Aştî de azadî, heskerdiş, empatî û fehm esto. Aştî xeylêk çîyan hewênena. Aştî zaf  girîng a.”

 

'Dayê bi 6 serrî!'

 

Elîfe hîsê xo wina ard ziwan: “Ma 4 kesî şîbî. Ez, kênaya xo û Serkan. Berna Îzmîr ra amebî. Ma Berna vînî kerd. Mi kênaya xo ra vat, 6in serrgera qirkerdişî yo. Do Îzmîr de abîdeyêk bibo. Ma do şêrê akerdişê ci. Kênaya mi vat, ‘Dayê bi 6 serrî. Sey vizêrî yeno mi vîr.' Semedê ma derbaz nêbeno. Sey vizêr o. Ê dîmenî verê çimanê ma ra nêşînê. Tena Berna ney, Sevgî Oztekîn zî embaza min bî. Ma pîya sofreyê xo pare kerd, ma embazê yewbînan bî. Ez Alî Kîtapçi, Mavîş û Îsmaîl Kizilçay zî nas kena."

 

'Xeyalê ey bi bedenê ey ê qijî dir şî' 

 

Elîfe, tuto bi nameyê Veysel Atilgal ke qirkerdiş de dinyaya xo bedilna ard vîr û vat: "Hêvîyê ê tutî bi bedenê ey qijî dir şî. Kam zanayîne do hema se bibo, do çi bivîno. Kênaya mi demo ke birîndar bî, kewtêne 17 serrîya xo. Kênaya mi do her wext bi travma dir  biciwîyo. Semedo ke vengê bomba hema zî yeno vîrê ci."

 

'Polîsan gaz eşt' 

 

Elîfe bale ant serê şîdetê polîsan û  vat: "10ê teşrîna verêne qetî nîno xovîrrakerdiş. Tarîx do her tim no plano lêşin û wehşetî binuso. Yê verê senîn ameyî nuştiş do no zî wina bêro nuştiş. Yê ke aştî wazenê tu wext nêbenê terorîst. Yê ke heskerdiş wazenê xirabî nêfikrîyenê. La cayo ke aştî bibo, azadî zî esta. 10ê teşrîna verênde peynî nêbi. Pirsûs û Amed peynî nêbi. Ma 10ê teşrîna verêne xo vîr ra nêkenê. Mimkun nîyo bêro xovîrrakerdiş."

 

'No travmayêke yo û qetî nêqedêno' 

 

Elîfe tewr peyîn wina vat: "Gelo na dewa eşkena bêro padayîş? Kes bi şube nêmerd, wesayît nêgina piro, cayêk ra nêgina erd ro. Ê merdimî parçe bî. No eşkeno bêro xovîrrakerdiş? No travmayêkê yo û qetî nîno xovîrrakerdiş. Îzmîr de abîdeyêk ame viraştiş. Semedê kesê ke dinyaya xo bedilnayê. Ez o şêrê akerdişê abîdeyî. Berna teqîyayîşî de erd de destê xo hetê mi ser derg kerd û vat, hetkarî bide mi. Kênaya mi zî erd de bî. Çimê Bernaye kewe bî. A rewşa ci verê çimanê mi de ya. Dimayê nê cuye mi asan nêbî. Semedê ke yê mendî zî rewşe zaf xirab bî."