Dilan Babat

 

ENQERE - Rozerîn Çukur qezayê Sûrê Amedî de demê qedexeyê tebervejîyayîşê kuçeyan de amebî qetilkerdiş û cipersayîşê derheqê merdişê aye de qerarê bêtaqîbî amebi dayîş. Serê nê de dosya berdî DDBî.

 

Qezaya Sûrî ya Amedî de prosesê qedexeyê tebervejîyayîşê kuçeyan de 8ê çeleyî yê 2016ine de Rozerîn Çukura 17 serrî ameye qetilkerdiş û cenazeya aye 5 mengî dima dayê keyeyî aye. Cipersayîşê merdişê aye de qerarê, ‘bêtaqîbî’ ame dayîş. Qerar hetê Serdozgerîya Komare ya Amedî ra ame dayîş û bahane zî îdiayê ke nameyê Rozerîne mîyanê endamê YPSyî de qiseykerdişê telsîzî de derbaz bîyo, ame ramojnayîş.

 

Qerar de nê îfadeyî ca girewtî: "Rozerîn Çukur tarîxê serebûtî de pêrodayîşî bi hêzê asayîşî dir merda û tewrbîyayîşê 'rêxistinê terorê PKK-KCK' de pêvînayîşê telsizî û zabitnameyê emniyetî de yeno famkerdiş, semedê serebûtî zî serê nameyê gumanbarî, hewceyê bi cipersayîşî çin o (…)”

 

Semedê îtîrazî red

 

Endama Komîsyona Huqûqî ya Şubeyê Heqê Merdiman (ÎHD) ya Amedî ke paştdayîşê huqûqî da keyeyê Rozerîne, hemverê qerarê nêtaqîbkerdişî muracatê Dadgerîya Cezaya ya Sulhî kerdî. 4in Dadgerîya Cezaya ya Sulhî ya Amedî de qerarê dozgerî goreyê qanûnî dî û îtîraz red kerd.

 

Semedê DDBî muracat: Dosya de delîlî çin ê

 

Avûkatanê keyeyê Rozerîne, serê redkerdişê îtirazî de muracatê Dadgeha Destûrê Bingeyîn (DDB) dayî. Muracat de ame dîyarkerdiş ke ewraqê dosyaya cipersayîşî de yê, derheqê ke Rozerîn Çukur, ‘endama rêxistinê çekdarî ya’, ‘tewrê çalakîya çekdarî bîya’ de delîl çin ê. Muracat de wina ame vatiş: “Mercîyê cipersayîşî vera ke cipersayîşêk bi tesîr bikerê, bi hukmkerdişê vernî û bi het têgêrayê û her kesê ke Sûr de dinyaya xo bedilnayê sey endamê rêxistine erjnayê. Meqsedê cipersayîşêko bi tesîr oyo ke berpirsîyarî bêrê tespîtkerdiş, cezakerdiş û vejîyê vernîya mercîyê edlî."