MERKEZÊ XEBERAN - Vera xîretê mudaxeleyî yê PDKyî Îdareyê Xoserî yê Şengalî xoverdayîşê şarê Şengalî selam kerd. Îdareyê Xoserî vat ke ê do bibê kabusê ê kesanê ke îradeyê şarî nêşinasnenê.

 

PDKyî bi bahaneya weçînayîşê Iraqî xîret kerd ke 2ê teşrîna verêne de hêzanê xo yê çekdaran Şengal de ca bikero. Yeno vatene ke PDK wazeno peymana 9ê teşrîna peyêne ya 2020î bivisno dewre. Selahîyetdarê Şengalî vanê ke PDK wazeno derbazê mîyanê şaristanî bino û baregehê leşkerî tede virazo. Goreyê agahî û dîmenanê ke Şengalî ra ameyî parekerdene  şaristan de rewşa îstîsnayîye esta. Şarê Şengalî ver bi noqtayanê Asayîşî û Meclîsanê Şarî herikîyeno.

 

Îdareyê Xoserî yê Şengalî pê eşkerayîyêke xoverdayîşê şarî selam kerd. Îdareyê Xoserî eşkerayîya xo de bi kilmî wina vat: "Pê fermanî ê nêeşkayî şarê ma çin bikerê nika zî pê kayanê sîyasîyan wazenê ney bikerê. Wa şarê ma hîşyar bo, destûr nêdo ê kesanê ke vera şarê ma planê gemarinî kenê. Şengal de ma îradeyê şarî ra ber îradeyêk qebul nêkenê. Çi hukmatê Iraqî çi hêzêko bîn kam ke teberê îradeyê şarê Şengalî de birêke bigêro şar do ey pûç bikero. Înan pê peymana 9ê teşrîna verêne îradeyê şarî nêşinasna. Coka ma zî înan nêşinasnenê. Şengal de her keyeyê ra yew/e destê DAÎŞî de yo/a. Kesê ke bîyî sebebê ney wazenê debikewê Şengalî û şarê ma rê reyna îxanet bikerê. Ma do cewab bidê înan. Ma do bibê kabusê ê kesanê ke îradeyê şarî nêşinasnenê. Wa biciwîyo xoverdayîşê şarê Şengalî."