ŞIRNEX - Cinîyê Cizîrî reaksîyon vera zêdebîyayîşê xebitnayîşê tiryakî dayî, veng dayî keyeyan ke wayîrê tutanê xo vejîyê û vatî: "Dewlete bi zanabîyayîş tutanê ma tîryakî musnena. Wazena ke ameyoxê kurdan; ciwanan çin bikero Ma cuya xo ra endîşeyîn ê."

 

Merkezê Şirnexî û qezayê ci bi polîtîkayê şerê taybetî ke herême de yeno kerdiş, pêwa tacîz û tecawuzî bi paştdayîşê hîn hêzan xebitnayîşê  tîryakî mîyanê ciwanan de her ke şino zêde beno. Merkez û qezayan de pêwa hende kamerayê mobese û pêwa ke serê her kuçeyêk de polîsî vindenê, xebitnayîşê tîryakî her ke şino mîyanê komelî de zêde beno.

 

Cinîyê ke qezaya Şirnexî Cizîrî de ciwîyenê, derheqê xebitnayîşê tîryakî de reaksîyonê xo ardî ziwan û vatî, rotişê tîryakî parçeyêk şerê taybetî yo û bi zanabîyayîş nê polîtîkayî yenê kerdiş.

 

'Wa hukmat peynîya nê polîtîkayanê xo bîyaro' 

 

Sîsê Yildiz Gorer zêdebîyayîşê xebitnayîşê tîryakî şermezar kerd û wina vat: “Cizîr de verê nê çî çinbî.  Ma nê çî qet qebûl nêkenê. Vernîya tutanê ma danê bêehlaqî. Dewlete tutanê ma xapênena. Bi zanabîyayîş verê tutanê ma danê çîyê xirab. Wazenê kurdan çin bikerê. Ma nêwazenê ke tutî û ciwanê ma tîryakî bixebitnê. wa fek nê çîyan ra vera bidê. Bajarê ma verê xeylêk pak bi. Kesî nêefterayîne nê çîyan bixebitno. Labelê çend serrê peyînî de nê çî zêde bîyê. Wa keyeyê ma tutanê xo îqaz bikerê û destûr nêdê tîryakî bixebitnê. Ma pêro zanê ke  dewlete bizanabîyayîş nê çî welatê ma de vila kena. Ganî cinî aya bê û vera rewşe bêveng nêmanê. Wa hukmat zî peynîya nê polîtîkayê xo yê lêşin bîyaro."

 

'Wa tutê ma kayê hukmatî ra nêxapîyê'

 

Nesîbe Darga zî wina reaksîyon ramojna: "Ma nêwazenê ciwanê ma bikewê rayîro xirab. Wexto ke ciwanî kewenê rayîro xirab keyeyî zaf qehr benê. Eke dewlete biwaştêne vernîya nê çî bigîro, do çîyan bikerdêne. La nêkena. No semedê keyeyan zulm o. Ma nêwazenê tutê ma bi tîryakî dinyaya xo bibedilnê. Dewlete hişê tutanê ma sereyê înan ra bena. Tutê ma semedo ke tîryakî xebitnenê çîyê xirab kenê. Dewlete nêwazena ciwanê ma mîyanê sîyasetî de ca bigîrê. Semedê nê zî vernîya ciwananê ma dana çîyê bêehlaq. Ganî keyeyê m atutanê xo bipawê û hemverê xebitnayîşê tîryakî de têkoşîn bikerê. Eke keyeyî tutanê xo miqatebê do dewlete nêeşko zirar bido. Ma tersenê tutanê xo vejê kuçeyan. Tutê ma vera xebitnayîşê tîryakî wa verê xo bidê xebate."

 

'Ma êdî nêzanê senîn tutanê xo bipawê' 

 

Meryem Aydin zî wina vat: “Ma hemverê xebitnayîşê tîryakî yê. Ma bîyê nobedarê tutanê xo. Ma şandînan destûr nêdanê ke tutê ma bikewê kuçeyan. Tu keyeyêk nêwazeno tutê înan bikewê rayîro xirab. Ganî her kes vera nê vengê xo berz bikero. Ma nê qebûl nêkenê. Semedê xebitnayîşê tîryakî hîn tutî întîhar kenê, yan zî yewbînan kardî kenê. Dewlete tu çîyêk nêkena. Wexto mesele sîyasî bo, semedê çekûyêk tutanê ma kenê zîndan û ceza înan rê danê. Labelê wexto ke mesela bena tîryakî tu çîyêk nêkena û nêvînena. Wexto ke semedê tîryakî destbend bikerê zî dimayê çend saetê bînî vera danê. Wexto ke taxa ma de ciwanî tîryakî xebitnenê, welatijê taxe hemverê înan vejênê. Ma Cizîrê verê wazenê. Cizîrê ma verê wina nêbê. Ma keyeyî nêeşkenê tu çîyêk bikerê. Dewlete zî tu çîyêk nêkena."

 

'Verê Cizîr de nê çî çinîbî'

 

Kulîcan Dert zî nê çî vatî: "Bi tîryakî û esrarî ciwananê ma xira kena. Kewenê kuçeyan tîryakî roşenê û danê tutanê ma. Rojêke ez serê siba rawuşta semedê çop bierzî mi dî ke ciwanêk tîryakî xebitneno û teber de rakewto. Verê Cizîr de nê çî çinbî. Ciwanê ma tu wext tîryakî nêxebitnayîne. Nika her ca xirab kerdê. Ma êdî nêeşkenê keyeyê xo ra vejê. Dewlete tu çîyêk nêkena. Xora bi destê xo nê çî kena. Ganî keyeyê ma wayîrê tutanê xo vejîyê. Demo ke mesele kurdî bê, heme çî  xirab kenê. No zî bi zanebîyayîş yeno kerdiş. Ma wazenê nê çîyê lêşînî welatê ma ra dûr bifînê."

 

'Serrê herra ma de tu wext çîyê wina nêameyîne ciwîyayîş' 

 

Ayşe Bîlîr zî wina vat: "Ez nika 60 serrî ya û heta nê emrê xo mi çîyêk wina tîya nêdîbi. Welatê ma de bi zanabîyayîş nê çî kenê. Cizîr de ciwanî xeylêk xira bîyê. Verê ciwanan dayê çîyê xirab û no zî bi zanabîyayîş yeno kerdiş. Wazenê îrade, kultur û bîyayîş ra dûr bifînê. Ganî komel û keye dest bidê destê yewbînan. Cuya tutanê ma herimnayî. Wazenê kurdan çin bikerê semedo ke ciwanî ameyoxê ma yê serê înan de şinê. Wazenê ciwanan bîyayîşê înan ra dûrbifînê. Wexto ke dewe de ciwîyayîne tutê ma tu wext çîyê wina nêkerdêne. Labelê dimayê ke ma koçê bajarî bî, ciwanê ma rayîra vetî. Vernîya ciwanan dayî tîryakî û çîyê xirab. Ma êdî tersenê ke tutanê xo vejê kuçeyan."

 

'Wazenê tuutanê ma çin bikerê' 

 

Tewr peyîn Heybet Yildiz zî wina vat: “Ma nêwazenê ke tutê ma bikewê nê rayîrê xirabî. Tutê ma sîyaset ra ewro zîndanan de yê. Yê ke teber de yê zî nê lêşinîyan înan rê ferz kenê. Ma êdî nêeşkenê tu çîyêk bikerê. Dewan, bajaran û welatê ma rijnayî. Tîryakî zî bi zanabîyayîş mîyanê tutanê ma de vila kenê. Tutê ma hişê xo vînî kerdî. Ma tersenê verê berê keyeyê xo de binişnê ro. Ciwanî wexto ke fikrê xo vanê, bi serran ceza înan rê yena dayîş. Kesê ke kurdkî qisey bikerê yenê tepiştiş. La wexto ke tîryakî xebitnenê tu çîyêk nêkenê. Wazenê tutanê ma çin bikerê. Dewlete tu çî nêkena. Bi zanabîyayîş nê lêşinî kena. Vernîya qedexeyê tebervejîyayîşê kuçeyan de tu ciwanêk nêeşkayîne û nêefterayîne tîryakî bixebitno. La nika nê lêşinî zêde bîyê."