COLEMÊRG - Cinîyê ke derheqê krîzê ekonomî de qisey kerdî û vat: "Îqtîdar wa  zamo ke kerdo peyser bianco, êdî bes o. Wa rewşa ma bivînê. Ma nêeşkenê bi nê zamî cuya xo dewam bikerê. Ma zî welatijê nê welatî yê."

 

Semedê pandemî krîzê ekonomî welat de her ke şino giran beno û semedê zamê ke yenê kerdiş, welatijî êdî aciz bîyê. Di serrê peyînan de semedê krîzî xeylêk kesî peynîya cuya xo ard û xeylêk welatijî zî ameyê sewîyeya ke nêeşkenê debara xo bikerê. Cinîyê taxa Ormanî ya Geverî ya Colemêrgî de ciwîyenê, dîyar kerdî ke semedê krîzî tengezar bîyê, nêeşkenê kîra bidê.

 

'Ma nêeşkenê fatura bidê' 

 

Peyruze Bor vat ke 40 serrî yo Gever de ciwîyena, 60 serrî ya û reya ewil o ke hende zamî yenê kerdiş û wina dewam kerd: "Verê çuwalêk 60 TL bi, nika bîyo 180. Tenekeyêk rûn 40 TL bi nika 180 yo. Krîz wina giran bîyo ma nêzanê se bikerê. Ma nêeşkenê fatureyê awe û ceyranî bidê."

 

'Wa dewlete hende ma nêpelçiqno' 

 

Peyruze wina dewam kerd: "Ma nêeşkenê kîra û fatura bidê. Wa Homa nê qebûl nêkero. Dewlete wa bi şarê xo nê nêkero. Ma cuyêka baş wazenê la dewlete bacan kena zêde. Kîra bîya hezar TL. Şar do senî cuya xo dewam bikero. Ma nêzanê fatura bidê yan xida bigîrê. Zimistan ame ma nêeşkenê arûdû bigîrê."

 

'Ma bi 40-50 TL debara xo kenê'

 

Esmer Aşkan zî reaksîyonê xo wina ramojna: "Her hewte zamî yenê kerdiş. Her hewte bi bahaneyê cîya zamî yenê kerdiş. Ma 9 nifûsî yê. Keyeyê ma 2 oda yo. Kes nêxebityeno. Lajêk mi emele yo, ewnîyeno ma ra. Reyan xebityeno, reyan nêxebityeno. Gever de kar çin o. Ma rojane bi 40-50 TL debara xo kenê. Zimistan ame. Komir çin o, kolî çin ê. Zamo ke yeno kerdiş zî tewr zêde tesîr serê feqîran de keno. Îqtîdar wa nê zaman vindarno. Ma bêçare yê. Ma nêeşkenê werdêk viraznê. Wa merdimayî bêro nê welatî."

 

'Berpirsyar dewlete ya' 

 

Besna Bor zî wina reaksîyon ramojna: "Ma nêeşkenê xida bigîrê. Her roje awe, ceyran û kira zêde benê. Ma kîra de yê. Kar çin o. Tutê ma şîyê bajarê rojawanî de xebityenê. Wa Homa nê qebûl nêkero. Ma nêzanê se bikerê. Dewlete berpirsîyar a, no zulm o û zulm bi ma kenê."