Medya Uren

 

MÊRDÎN - Krîzê ekonomîye Tirkîya de kûr beno û tesîrê xo tewr zêde serê cinîyan de keno. Cinîyê karkerî yê ke serê erdde xebityenê û binê tesîrêk negatîf de manenê wina vatî: "Krîzê ekonomî paşta ma şikina. Semedo ke ma debara xo bikerê, ma karê zehmetî kenê. La hema zî ma nêeşkenê lazimîyê xo bi ca bîyarê. Rewşa ma ya nika ra sîstem berpirsîyar o. Lazim o hetê çareserî de gamê girîngî bêrê eştiş."

 

Tirkîya de her ke şino krîzê ekonomî pîl beno û welatijê zehmetîyê pîlî ancenê. Tewr zêde cinî nêeşkenê heqdestê xo bigîrê. Bi taybet zî herêmê kurdan de dewan de dayeyê feqîrî zêde bena û no zî beno sebebê koçberî. Derheqê krîzê ekonomî de ma qezayê Qoser, Dêrik û Şemrexî de mîkrofonê dergê cinîyan kerd.

 

'Ez nêeşkena tutanê xo pîl bikerî'

 

Bahar Yigit ke merkezê Dêrikî de karê mewsîmî kena. Aye dayîka 7 tutan a û hewl dana ke bi nê karî debara xo bikero. Bahare wina vat: "Ez nêeşkena tutanê xo pîl bikerî û ez nê problemî de tena nîya. Dêrik ra bigeyrê, şima do bi seyan dayîkê sey mi bivînê. Ma mecbûrî yenê karê mewsîmî bikerê. Tutê ma zî keye de bi wayîr manenê. Ma înan emanetê yewbînan kenê."

 

'Ma cinî îmkan û kar wazenê'

 

Ezîze Ateş qezaya Dêrikî ra ya wina vat: "Eke nan çin bo ma borê ma mecbûr ê ke çi kar bibo ma bikerê. Yan ma do tîya ra koç bikerê yan zî ma do bixebityê. Mecbûrî yo! Semedê 80 lîrayî ma 8 saetan verê tîjî de xebityenê. Ma karêk bîn bîbîne mi no kar bikerdêne? Nika feqîrî, krîzê ekonomî zêde bîyo û bi taybetî zî herêma ma de debare zehmet bîya. Lazim o semedê sererastkerdişê ekonomî gamê girîng bêrê eştiş. Ma cinî îmkan û kar wazenê."

 

'Hêvîdar a ke îmkanê karî tîya bêrê zêdekerdiş' 

 

Xatun Ateş ke qezaya Şemrexî ra ya wina vat: "Karkerê tîya tewr zêde  yan dayîk ê yan zî tut ê. Semedo ke ma debara xo bikerê ma zî mecbûr yenê. Ma reyna zî kêfweş ê ke herêma ma de îmkanê qij zî bêrê awankerdiş. Ma wazenê herîma xo de mîyanê herra xo de bixebityê. Nê serrê peyînan de welatijî xeylêk problemê ekonomî vînenê. Nika mêrdeyê mi zî nêxebityeno.Ez zî, o zî ça kar bibo ma şinê. Nêbo ma keye de yê. Ma her di zî nika betal ê. Hêvîdar a ke îmkanê karî tîya bêrê zêdekerdiş."

 

'Semedê polîtîkayê sîstemê şaşî şar vêşan maneno' 

 

Ayşegul Yigit ke qezaya Qoserî ra ya wina vat: "Krîzê ekonomî paşta ma şikina. Semedo ke ma debara xo bikerê ma karê zehmet kenê, labelê hema zî ma nêeşkenê lazimîyê xo yê rojane zî bi ca bîyarê. Na rewşe ma zî sîstemê nika ra berpirsyar ê. Semedê polîtîkayê sîstemî yê şaşî şar vêşan maneno. Lazim o hetê çareserî de gamê girîng bêrê eştiş. Ma vînenê cayê ke bi problemê şarî eleqedar bibê, bi karê teberî dir eleqedar benê."