RIHA - Çalakîya "Nobeta Edaletî" ya Keyeyê Şenyaşarî 205 rojî yo dewam kena. Keyeyî ewro nê mesajî pare kerd: "Heta edalet bi ca bêro ma do verê berê Edlîyeyê Rihayî de bê." 

 

Qezaya Pirsûsî ya Rihayî de 14ê Hezîrana 2018 de merdim û pawitoxê parlamenterê AKPyî hêrişê  keyeyê Şenyaşarî kerdibi û mêrde û di lajê Emîne Şenyaşar qetil kerdibî. Emîne û lajê xo Ferît ke qirkerdiş ra bi birîndarî xelisyayî hemverê bêhuqûqî 9ê Adare ra verê Edliyeyê Rihayî dest bi Nobeta Edaletî kerdibî û nobeta înan roja 205ine de dewam kena.

 

Keyeyê Şenyaşarî serê medyaya dîjîtalî de ewro nê pare kerd: "Têkoşînê ma yê edaletî bi rojan, hewteyan, mengan, mewsîman û bi serran dewam kerd. Heta emrê ma qîm bikero û heta edalet bi ca bêro ma do verê berê Edliyeyê Rihayî de bê."