ENQERE - Cinî derheqê tecrîdê giran ê serê Rayberê PKKyî Abdullah Ocalanî de qisey kerdî û dîyar kerdî ke pêro şar binê tecrîdî de yo û do bi têkoşînê xo tecrîd bişikinê.

 

Tecrîdo giran ê serê Rayberê PKKyî Abdullah Ocalanî dewam keno û sere de zîndanan, welat, Rojhelata Mîyanên û welatê Ewropa de hemverê tecrîdî çalakî dewam kenê. Tepişteyê PKK û PAJKî  27ê Teşrîna Peyêne de dest bi grev kerdibî û çalakî 12ê êlule de peynî kerdibî.

 

Cinîyê sîyasetmedarî derheqê tecrîdî de qisey kerdî û dîyar kerdî ke tecrîd heme komelî rê vila bîyo û do bi têkoşîn tecrîd bişikinê.

 

'Komel binê tecrîdî de yo' 

 

Hemşaredara HDPyî ya Sîlopî Adalet Fîdan dîyar kerd ke komel pêro binê tecrîdî de yo û vat: "Ma prosesêkê ke tacîz, tecawuz û şîdet yeno meşrûkerdiş ra derbaz benê. Bi nê wazenê îradeyê şarî teslîm bigîrê. Ganî problemê kurdî bêro çareserkerdiş. Ganî Kurdî xo bi ziwanê xo îfade bikerê. Ganî şar bi nasnameyê xo bêro şinasnayîş. La îqtîdar goreyê berjewendîyê xo têgêreno."

 

'Ez tecrîd kûr ra hîs kena'

 

Endama Meclîsê Şaredarîya Peyasî Nevîn Oyman zî vat, pêro şar binê tecrîdî yo û wina dewam kerd: "Ma tecrîd kûr ra hîs kenê. Ma ameyê sewîyeya ke nêeşkenê qisey bikerê. No zî giranbîyayîşê tecrîdî nîşan dano. Kes nêwazeno qisey bikero. Ez xo azad hîs nêkena. Her tim binê teda de hîs kena. Feshkerdişê pêkerdişê Stenbolî zî tecrîd o.”

 

'Tecrîd sûcê merdimayî yo'

 

Hemşaredara Stewrî Gulîstan Oncu zî bale ant tecrîdê giran ê serê Rayberê PKKyî Abdullah Ocalanî û vat: "Bi tecrîdî wazenê vernîya cuye û fikrê azad bigîrê. Bêguman tewr zêde tecrîd tesîr serê Kurdan keno. Tecrîd vernîya her çî gêno. Tesîr serê ekonomî, sîyaset, cuye keno. Ganî her kes bi hişmendî û rêxistinkerde hemverê tecrîdî de vinderê."

 

'Ma do bi têkoşîn tecrîd bişikinê'

 

Endama Meclîsê Şaredarîya Êlihî Şukran Çelebî zî bale ant serê polîtîkayê ke îradeyê cinîyan, komel û şaran nas nêkeno û vat: "Rayberê PKKyî Abdullah Ocalanî hemverê polîtîkayê yewpawitoxî paradîgma aver berd. Fikrê demokratîk, ekolojîk û azadîya cinî Rojhelatê Mîyanên aver berd. Merdimî xo nê fehmî de vînenê. Merdimî na cuye de cuya têduşt û birûmet dî. Îqtîdar nê paradîgmayî xo rê sey tehdîdî dî. No têkoşîn do peynîya nê sîstemî bîyaro. Ma do tecrîd bi têkoşînê xo zor berê."