Sema Çaglak

 

AMED - Endama Meclîsê Ciwanan a HDPyî Gulîstan Yilmaz bale ant serê polîtîkayê şerî yê hemverê ciwanan û vat: "Ma çarçewaya kampanyaya 'Ma tiryakbîyayîşî bişikinê cuya newe awan bikerê' taxe, dewe û bajaran bi ciwanan dir yenê têhet. Îqtîdar bi her tewirê polîtîkayê şerî hêrişê ciwanan keno û wazeno zorê têkoşînê bi rêxistinî bero. La ciwanî do bi têkoşînêk topyekûn cewabê polîtîkayê şerî bidê."

 

Meclîsê Ciwanan ê Partîya Demokratîke ya Şaran (HDP), 10ê êlule de startê kampanyaya xo ya "Ma tiryakbîyayîşê cuya awan bikerê" dabî. Meclîsê Ciwanan bi nê kampanya hedef kenê ke bale biancê serê tîryakî û vilabîyayîşê fihûşî yê herême. Derheqê kampanya de endama Meclîsê Ciwanê HDPyî Gulîstan Yilmaz qisey kerd.

 

'Hemverê ciwanan polîtîkayê taybetî yeno kerdiş'

 

Gulîstane destpêkê qiseykerdişê xo de dîyar kerd ke amancê kampanyaya înan hamleyêk hemverê polîtîkayê şerî yê taybetî û vat: "Demê peyîn de hemverê ciwanan polîtîkayê teda û zordarî kûr beno. Sewbîna ma vînenê ke xebitnayîşê tîryakî û vilabîyayîşê fihuşî zî her herême de zêde beno.  Kampanyaya ma zî hemverê nê polîtîkayî hemleyêk girîng o. Bi taybetî zî hemverê polîtîkayê hemverê cinîyê ciwanan, polîtîkayê perwerde, ekonomî û şerî yê taybetî ke hemverê ciwanan yenê kerdiş vejênê. Ma wazenê na cografya de ciwanê ke kewtê torra tîryakî û fihûşî ra xelas bikerê. Bi no hawa ma sey ciwanan bi vatişê xo, bi pratîkê xo her wareyê komelî bê. Ewilî zî ganî tecrîdê ke vernîya nê polîtîkayan akeno bêro şiknayîş. Hemleyê ma eynî wextî de semedê şikinayîşê tecrîdê serê Rayberê Şarê Kurdî Abdullah Ocalanî û awankerdişê cuyêke azad û demokratîkî yo. Sey yeno zanayîş tecrîdê hemverê Birêz Ocalanî her ke şino tewr giran beno. Semedê nê sebebî ganî tecrîd bêro şikinayîş û Birêz Ocalan bi fîzîkî azad bibo. Ma semedê nê zî têkoşîn bikerê."

 

'Tena amed de 400 tewr zêde keyeyê fihûşî estê' 

 

Gulîstane dîyar kerd ke tena Amed de 400ê tewr zêde xebitnayîşê fihûşî estê û vat: "Her roje bi desin keyeyê kurdan yenê desteserkerdiş la îqtîdaro faşist senî hayeyê ci keyeyê ke semedê fihûşî ameyê girewtiş nêbeno? Ma zanê ke xeylêk keyeyê fihûşî bi deste îqtîdarî ameyo akerdiş û ajanî  ciwanan rê yeno ferzkerdiş. Xeylêk tewirê polîtîkayê şerî yê taybetî estê ke vernîya asîmilasyonî, dejenerasyonî akeno û merdimî kultur, ziwan, tarîx û bîyayîşê xo ra dûr fîneno. Bi taybetî zî bi rayîrê medyaya dîjîtal nê polîtîkayî yenê averşîyayîş. Bi rayîrê rêzefîlman ciwanan kultur û metodê înan ê cuye dûr fînenê. Înan rê cuyêka bi dejenere yenê averşîyayîş. Sewbîna fikrê serê komelî zî sînor kenê û wîjdanê komelî bi rayîrê nê rêzefîlman yenê çinkerdiş. Hetê îqtîdarî ra ciwanan rê cuyêka sexte yena awankerdiş. Hetê fikirnayîş, berardiş û munaqeşekerdiş û nîqaşkerdişê problemê komelî dir rayîrê ciwanan yeno padayîş. Bi taybetî zî herême de hemverê ciwanê welatparêzan polîtîkayî yenê kerdiş."

 

'Bi têkoşîn ma do serbikewê'

 

Gulîstane tewr peyîn wina vat: "Bi tu hawa nê hêrişî nînê qebûlkerdiş. Ma sey Meclîsê Ciwanan ê HDPyî do hemverê hêrişê taybetî têkoşînê xo pîl bikerê. Pêwa polîtîkayê teda û zordarî ma do rêxistinbîyayîşê xo ra tavîz nêdanê. Ez veng dana heme ciwan û cinîyê ciwanan kena ke hemverê nê zîhnîyetê faşîst ma xo bi rêxistin bikerê û bi têkoşîn zî ma eşkenê serbikewê."