Sevîm Sutcu

 

Tecrîdo giran ke serê Rayberê PKKyî Abdullah Ocalanî de û serê Şarê Kurdî yeno kerdiş, her ke şino tewr giran beno. Tecrîd her hetê komelî de vila bîyo û dewleta wayîrê zîhnîyetê serdest ya camêrd, bi taybetî hewl dana bi tecrîd cinîyan bêveng kena. Hem serê dayîkê ke tutê înan tepişte yê û hem zî serê heme cinîyan de tecrîd yeno kerdiş. 

 

Însiyatîfê Dayîkê Aştîye Gulîstan û dayîka tepişteyê bi nameyê Savaş Barin ê zîndanê Tîpê F yê Boluyî de manneo, Rabîa Barin derheqê tecrîdê giran yê bi serran o serê Abdullah Ocalanî, Şarê Kurdî û cinîyan ser o yeno kerdiş de ercnayîş kerd.

 

'Dewlete tersan ra tecrîd dewam kena'

 

Gulîstane dîyar kerd ke dewlete nêwazena Abdullah Ocalan bi Kurdan dir pêvînayîş bikero û semedê nê bi serran o tecrîd yeno kerdiş û vat: “La dewlete nimte ci dir pêvînayîş kena. Dewlete nêwazena avûkat û keye bi Rayberî dir pêvînayîş bikero. Nêwazena fikrê ci biresi şarî. La dewlete her roje bixo şina. Ey dir qisey kena û fikrê ey gêna. sebebê caardişê tecrîdî tersê dewlete yo. No ters çibayîne do no şer wina dewam nêkerdêne."

 

'Wa tecrîd wedarnê' 

 

Gulîstane bale ant tecrîdê Abdullah Ocalanî ser o û vat: "Mecbûr ê tecrîd wedarnê. Wa her kes semedê Rayberî vejîyo kuçeyan. Dem demê azdîye yo.  Wa her kes keyeyê xo ra vejîyo û televîzyon temaşe nêkero. Wa biherikyê kuçeyan. Kezeba Kurdan veşa ya. Ma vanê yan Azadî yan azadî. Ez veng dana heme kurdan ke wa hişê xo bigîrê sereyê xo.”

 

'Ekonomî qedîya ya'

 

Rabîaye zî dîyar kerd ke Abdullah Ocalan bîyayîşê Kurdan veto werte û coka serê ey de tecrîd yeno kerdiş û vat: “Tecrîdê serê Rayberê ma yeno manaya tecrîdkerdişê şarê ma û tepişteyan. Semedo ke wazenê şar biterso û yê ke nêterseno zî kenê zîndanan. Merdimî êdî nêeşkenê serê çapemenîya komelî de çîyêk pare bikerê. Xeylê ciwanî mecbûr manenê vejîyê teberê Tirkîya. Ekonomî qedîyaya, betalî esta."

 

'Şarê Kurdî nika heme tecrîdkerde yo'

 

Rabîa tewr peyîn wina vat: "Xeylê tepişteyî nêweş ê. Heme binê tecrîdî de yê. Zîndanan de xoverdayîş esto. Kes nêeşkeno qisey bikero. Dewlete nêverdena kurdkî bêro qiseykerdiş. Semedê çîyêk qijî yenê destbendkerdiş û tepiştiş. Nika heme kurdî binê tecrîdî de yê. Ez 52 serrî ya. Hêrişê dewlete ne ewro, her tim bi. Ez tutîya xo de nê hêrişan baş zana. Ma her tim rastê teda û hêrişan ameyî. Na dewlete heme merdimê dinya ra hes kena la tena kurdan ra hes nêekna û qebûl nêkena. Coka dem demê ayabîyayîşî yo."