RIHA - Nobeta Emîne Şenyaşar û lajê aye 200 rojî yo dewam keno. Yeno pawitiş ke ewro 200 avûkatî tewrê nobeta Keyeyê Şenyaşarî bibê û verê berê edlîye de eşkerayîyêk bidê. Vernîya eşkerayî polîsan fotografê ke Keyeyê Şenyaşarî daliqnabî verê edlîye de  desteserkerdî.

 

Merdimê Parlametnerê AKPyî yê Rihayê Îbrahîm Halîl Yildiz qezaya Pirsûsî de 14ê hezîrana 2014 de hêrişê ferdê Keyeyê Şenyaşarî kerdibi û hîrê ferdê keyeyî amebî qetilkerdiş. Emîne Şenyaşar û lajê xo Ferît Şenyaşar zî semedê edalet dosya ser o bi ca bêro û Fadil Şenyaşaro tepişte bêro veradayîş,  9ê adare ra verê Edliyeyê Rihayî de nobeta edaletî gênê. Nobeta keyeyî 200 rojî yo dewam kena. Emîne û Ferît Şenyaşar sey her roje qezaya Pirsûsî ra ameyî û cayê çalakîya xo de dest bi nobete kerdî. 

 

Sewbîna yeno pawitiş ke Komeleya Huqûqnasê Semedê Azadîye (OHD) yê Şubeyê Rihayî bi seyan avûkatî verê Edliyeyê Rihayî de beşdarê Nobeta Edaletî ya Keyeyê Şenyaşarî bibê û saete 14.00 de zî eşkerayî bidê çapemenî.

 

Saetê sibayî de verê edlîye hetê polîsan ra ameyo ablûqakerdiş û xeylêk hêzê asayîşî ameyê girewtiş. Vernîya eşkerayî Emine û lajê xo  Ferîtî waştî ke fotografan bidê serê  şoveleyan, dimayê ke polîsan fotografan dî ê fotografan û pankartî desteser kerdî. Mabêne keyeyê şenyaşar û polîsan de demêk munaqeşe vejîya.