Medya Uren 

 

MÊRDÎN - Çarçewaya mîtîngî "Nîjadperestî û Cinsperestî rê Êdî Bes o, Dem Demê Azadîya Cinîyan o” Mêrdîn de zî hetê cinîyanê HDPyî û TJAyî ra xebatî ameyî destpêkerdiş. Aktivîsta TJAyî Rênas Abruşu dîyar kerd ke ê do vera hêriş û astengiyan zî xebatê xo bikerê û bi yewîya cinîyanê Mêrdînî ra torra xo ya têkoşînî girs bikerê.

 

Bi sloganê, "Nîjadperestî û Cinsperestî rê Êdî Bes o, Dem Demê Azadîya Cinîyan o" hetê Partîya Herêma Demokratîk (DBP), Partîya Demokratîke ya Şaran (HDP) û Tevgerê Cinîyan ê Azadan (TJA) do mîtîngêk herêmî do 16ê teşrîna verêne de bêro kerdiş. Semedê  xebatê mîtîngî herêman zî start ameyî dayîş. Derheqê mîtîng û xebatê ke do Mêrdînî bêrê kerdiş aktîvîsta TJAyî Rênas Aburşu ajansê ma rê qisey kerd.

 

‘Hemverê kultur û ziwanê ma hêriş esto’

 

Rênase destpêk de wina vat: “Tirkîya û bi taybetî zî herême de hêrişê polîtîkayê taybetî serê cinî û ciwanan de yenê kerdiş. Tecawuz, fuhuş û tiryakî sewîyeya tewr zêde. Bi polîtîkayê bêcezaverdayîşî dir bi taybetî zî benê sebebê qetilkerdişê cinîyan û zêdebîyayîşê şîdetî. Ma her roj benê şahidê nê serebûtî. Hetêk ra hêrişêk pîl  serê kultur, ziwan û bîyayîşê ma kurdan esto. No polîtîkayê AKP û MHPyî yê ke bi eşkere dişminîyê cinyîan kenê. Semedo ke wiştişê cinîyan sey tehdîdêk vînenê. Zanê ê do nêeşkê hemverê têkoşînê cinîyan xo ver bidê, ê hêrişanê xo kenê."

 

‘Qedexeyê walîyî kêfî yê’

 

Rênase wina dewam kerd: "Mêrdîn de her 15 rojî ra reyke qedexeyê çalakiyan yenê newekerdiş. Qedexeyê walî kêyfî yê. Dimayê ke ma start da dima walî qedexeyê 15 rojan newe kerd. Bi nê metodan ê do nêeşkê çalakîyanê ma vindernê. Ma do sey cinîyê HDP û TJAyî hemverê cinsperestî û nîjadperestî reaksîyonê xo bi hawayêk xurt nîşan bidê. Ma do xebatê xo taxan bidê dewamkerdiş. Ma na babete de bi israr ê. Ma vanê  dem demê azadîye yo."

 

‘Bêrê ma pîya torra xo ya têkoşînî bi hêz bikerê’

 

Rênase tewr peyîn wina vat: "Lazim o heme şar û bi taybetî zî cinî wayîrê kulturê xo, ziwanê xo û xo vejîyê. Ganî ma hemverê her tewir nîjadperestî û cinsperestî vengê xo bikerê yew. Bêrê ma pîya torra xo ya têkoşînî bi hêz bikerê. Wa vengê ma, rengê ma bibo yew. Ma do bi nê rengî xoverdayîşê xo û têkoşînê xo xurt bikerê. Ma do ancax bi nê rengî bieşkê serbikewê û xeylêk  destkewtişan bi dest bikerê.”