Rojda Aydin

 

ŞIRNEX - Bi ameyîşê mewsîmê payîze dir demê wedarnayîşê mahserî zî dest pêkerd. Engura mezrone ke mewsîmê payizî de resena, berardişê sey dims, bastêq û meşlûlî yenê viraştiş. Cinîyê Hezexî ke mahsere wedarnenê dîyar kerdî ke tewr zêde cinî kede danê û keda înan zî nîna vînayîş. 

 

Bajarokê Erebanî yê qezaya Hezexê Şirnexî de cinîyê ke dest bi berardişê mahserî kerdî ajansê ma rê qisey kerdî û qalê adetê mahserî kerdî.

 

‘No mewsîm mewsîmê mahserî yo’

 

Cinîyan ra Mûzeyyen Înan ke semedê amadekarîya zimistanî dest bi wedartişê mahserî kerd wina vat: “No mewsîm mewsîmê mahserî yo. Her serre nê mewsîmî de ma cinî yenê engure xo pîya kom kenê. Ma engure xo vernîya rojêke kom kenê. Ma karê xo pare kenê û her cinîyêke çîyêk kena. Ma emsar engure xo xeylêk leze kom kerd. Semedo ke wexto vartî bivaro yan zî xişike bivaro engure qeleşêna û zirar vînena.  Sey ma sere de zî vat, ma engure xo verê yerî kom kenê û dima ra yê baş û yê nêbaş yewbînan ra visnenê. Yew ma ra engure eserneno û awe ci keno satilan. Tewr peyîn ma satilan danê serê adir û girnenê. Ma dimso ke viraznenê nêroşenê. Ma tena semedê keyeyê xo viraznenê.” 

 

Keda ke nîna vînayîş

 

Mûzeyyene tewr peyîn vat ke viraştişê dims, meşlûl, bastêq û sewbîna keda cinîyan zaf pîl a û vat: “Viraştişê dimsî xeylêk zehmet o. Ma tim verê adirî de vindenê û dimsê satilan de serê adirî de têdanê. La sey karêk asan yeno vînayîş û keda ma nîna vînayîş. Nê berardişê ke ma engure viraznenê, ma tena semedê xo viraznenê semedo ke rezê ma tay o. Heta ke merdim kede nêdo nêeşkeno biwero. Sewbîna no dims semedê weşî zî xeylêk baş o. Zimistanî xeylêk zêde yeno xebitnayîş. Ma her serre nê mewsîmî de yenê serê mahserî û şîreyê engure ra xeylêk berardişan viraznenê. No hîrê serrê peyên de semedo ke engure ma xira bîne, ma nêeşkayîne dims yan zî bastêq û meşlûlan viraznê. La mi emsar reyke bîn viraşt. Bi nêzdîyê 30 serrî yo viraznena.”

 

‘No kar zaf zehmet o’

 

Fatma Ozkan zî wina vat: “Her het ra no kar xeylêk zehmet o. Ma şinê rezan ra engure kom kenê û anê. Dima ra yewbînan ra visnenê û esernenê, girnenê û kenê dims û xeylêk berardişê bînî ke şîre û ardan ra virazênê. Nê heme zî kedêke pîl wazenê. La peynîya no karî zî zaf weş o. Ez ewro ameya hetkarîya dayika xo. Ma zehmetîyêk pîl ant. Min heta nika no kar nêkerdibi. Reya yewin o ez ameya serê mahserî. Ma hetkarîya yewbînan kenê û bi hawayêke  komunal xebityenê. Wedaritişê mahserî de tewr zêde cinî benê rincan, semedo ke zêde xebityenê. Semedê amadekarîyê zimistanî ma nê karî kenê. Xêrcê dimsî hetêk ra zî meşlûl û bastêq zî viraznenê. Tîjî zaf xidar a û ma zî binê na tîje de xebityenê. La peynîya ci zî weş a. Ma dims ra xeylêk berardişê bînan viraznenê.”