Sema Çaglak 

 

AMED -  Azîze Kaydaş ke 23 serrî yo debara xo bi berardişî titûnî kena û pê 6 tutanê xo wey kena. Azîze dîyar kerd ke seba krîzê ekonomî êdî nêeşkenê debara xo ya rojane zî bikerê û vat: "Ma 4 mengî bi berardişê titûnê dir eleqedar benê la ma ney, kesê ke bazirganiyê nê karî kenê qezenç kenê. No zî nîşaneyê kedwerdişî yo.”

 

Yew problemê Tirkîya yê tewr pîl krîzê ekonomîye yo. Krîzê ekonomî ke her şino kûr beno, bi taybetî tesîr serê citkaran de keno. Citkarî krîzê ekonomî ra gerrekerdox ê û êdî nêeşkenê debara xo ya rojane zî bikerê. Dewijê  Mehmediyî yê Karazê Amedî, bi berardişê titûnî debara xo kenê. Nînan ra yew zî Azîze Kaydaş a 45 serrî ya. Azîze 23 serrî yo bi berardişê titûnê debara xo kena û pê 6 tutanê xo wey kena.

 

‘Bi titûn debara xo kena’

 

Azîze wina qalê prosesî kerd: “Menga sibate de ma cite kenê, menga gulane de ramnenê û menga hezîrane de zî aşêfe kenê. Tewr peyîn menga temmuze de zî ma pelan arêdanê. Ma nê pelan yew bi yew kenê lawa û vejenê serê banî û verê tîjî de wişk kenê. Peynîya peynî zî ma pelê titûnî wişk bîyê kenê tûrikan. Dimayê nê prosesê rotişî dest pêkeno. Zehmetî ci xeylêk o. Dewe de her kes bi titûnî debara xo keno semedo ke çîyêk bîn çin o.”

 

‘Ez mecbûr a ke karê titûnî bikerî’

 

Azîze dewam de wina vat: "Ez mecbûr a ke nê karî bikerî. Demêk derg o mêrdeyê mi dinyaya xo bedilnayo.  Ez bi tena sereyê xo debara keyeyê xo kena û tutanê xo wey kena. 6 tutê mi estê û heme zî wanenê. Qîm nêkero zî ez pê îdareyê xo kena. Xora nika her çî bîyo vay. Ma 4 mengî yo nê karî dir eleqedar benê la hemverê keda xo nêgînê. Ma kiloyê titûnî roşenê 12 TL. Ma hende zêde kede danê la yê ke bazirganiyê titûnî kenê tewr zêde qezenc kenê. Nê karî de hem kedwerdiş esto, hem zî mecbûrbîyayîş esto.”

 

‘Vera qedexeyî ganî rayîrê alternatîfî bêrê awankerdiş’

 

Azîze tewr peyîn wina vat: “Krîzê ekonomî her ke şino kûr beno. Êdî derdê şarî tena debara rojane ya. Sewbîna krîzê ekonomî problemo sereyîn o, seba ke cinîyan rê îmkanê ekonomî nînê awankerdiş, cinî tewr zêde zehmetîyan vînenê. Sewbîna dewa ma hetê berardişê titûnî de wayîrê herrêke bi bereket a. Nika zî hewl danê ke berardişê titûnî herême de asteng bikerê. Wexto ke yeno astengkerdiş zî ganî semedê welatijî debara xo bikerê rayîrê alternatîfî bêrê awankerdiş. Astengkerdişê berardişê titûnî yeno manaya perîşaniyê welatijan.”